اسلام آباد : الیکشن کمیشن آف پاکستان نے وزیراعظم شاہد خاقان عباسی کے خلائی مخلوق والے بیان کی تردید کرتے ہوئے کہا ہے کہ یہ بیان آئین کی روح، الیکشن کمیشن کے مینڈیٹ کے خلاف ہے۔
تفصیلات کےمطابق الیکشن کمیشن کے ترجمان نے وزیراعظم شاہد خاقان عباسی کے خلائی مخلوق والے بیان کی تردید کرتے ہوئے کہا ہے کہ الیکشن کمیشن انتخابات کے لیے مکمل تیارہے۔
ترجمان الیکشن کمیشن نے کہا کہ انتخابات کوئی خلائی مخلوق کرا رہا ہے والےبیان کی تردید کرتے ہیں، یہ بیان آئین کی روح، الیکشن کمیشن کےمینڈیٹ کے خلاف ہے، الیکشن کمیشن آئینی وقانونی ذمہ داریوں میں مکمل آزاد ہے۔
ترجمان نے کہا کہ اہم منصب پرفائزشخصیات ایسے بیانات سے گریزکریں، ایسے بیانات محض قیاس آرائیوں اور مفروضوں پرمبنی ہوتے ہیں، ایسے بیانات آئین کے منافی ، تمسخراڑانے کے مترادف ہیں۔
انتخابات نگراں وزیراعظم نہیں خلائی مخلوق کرائے گی‘شاہد خاقان عباسی
خیال رہے کہ گزشتہ روز اسپیکرقومی اسمبلی سردار ایازصادق کی جانب سے ارکان کو دیے گئےعشائیے میں صحافیوں سے غیررسمی گفتگو کرتے ہوئے وزیراعظم نے کہا تھا کہ انتخابات خلائی مخلوق کرائے گی۔
نگراں حکومت کے حوالے سے وزیراعظم شاہد خاقان عباسی کا کہنا تھا کہ حکومت اپوزیشن کی جانب سے پیش کیے گئے کسی بھی نام کو باہمی اتفاق سے قبول کرلے گی۔
آئندہ الیکشن میں ن لیگ کا مقابلہ خلائی مخلوق کے ساتھ ہے‘ نوازشریف
یاد رہے کہ 2 مئی 2018 کو صادق آباد میں جلسے سے خطاب کرتے ہوئے سابق وزیراعظم نوازشریف نے کہا تھا کہ آئندہ انتخابات میں ہمارا معرکہ پیپلزپارٹی یا پاکستان تحریک انصاف سے نہیں بلکہ خلائی مخلوق سے ہوگا۔
خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پرشیئر کریں۔
