اسلام آباد : الیکشن کمیشن کا کہنا ہے کہ توہین الیکشن کمیشن کیس میں عمران خان اگلی سماعت پر پیش نہ ہوئے تو وارنٹ جاری کریں گے۔
تفصیلات کے مطابق الیکشن کمیشن میں عمران خان کیخلاف توہین الیکشن کمیشن کے معاملے پر سماعت ہوئی ، الیکشن کمیشن کے ممبر سندھ کی سربراہی میں چار رکنی بنچ نے کیس کی سماعت کی۔
چیئرمین پی ٹی آئی، اسد عمر اور فواد چوہدری میں سے کوئی پیش نہ ہوا تاہم تحریک انصاف کی طرف سے وکیل علی بخاری الیکشن کمیشن میں پیش ہوئے۔
علی بخاری نے بتایا کہ عمران خان کی صحت اجازت نہیں دیتی کہ وہ پیش ہو سکیں، فوادچوہدری کی والدہ شدید علیل ہیں وہ اسپتال میں ہیں جبکہ اسد عمر کی فلائٹ لیٹ ہوگئی جس کی وجہ سےپیش نہیں ہوسکے۔
وکیل نے استدعا کی کہ عمران خان اور فواد چوہدری کوحاضری سے استثنیٰ دیا جائے ، جس پر ممبر نثار درانی نے کہا کہ 4ماہ ہوگئے ہیں وہ الیکشن کمیشن میں پیش نہیں ہورہے۔
ممبر نثار درانی کا کہنا تھا کہ آپ عمران خان کا میڈیکل سرٹیفکیٹ الیکشن کمیشن میں جمع کرائیں ، آپ شوکاز نوٹس کا جواب جمع کرائیں۔
جس پر وکیل علی بخاری نے کہا کہ جواب سینئر کونسلز جمع کرائے گی، وکیل انور منصور نے بتایا کہ اگلی سماعت سے پہلے جواب جمع کرادیں گے۔
الیکشن کمیشن نے کہا کہ آئندہ سماعت پر پیش نہ ہوئے تو وارنٹ جاری کریں گے اور سماعت 17جنوری تک ملتوی کردی.
