اسلام آباد : الیکشن کمیشن آف پاکستان نے 8فروری2024 کو عام انتخابات کا نوٹیفکیشن جاری کردیا ، جس میں کہا ہے کہ وفاق اور چاروں صوبائی اسمبلیوں کے انتخابات ایک ہی روز ہوں گے۔
تفصیلات کے مطابق الیکشن کمیشن آف پاکستان نے عام انتخابات کی تاریخ کا نوٹیفکیشن جاری کردیا ، جس میں کہا ہے کہ عام انتخابات کا اعلان الیکشن ایکٹ کے سیکشن 57 کے تحت کیا گیا ہے۔
نوٹیفیکیشن میں کہا گیا کہ سپریم کورٹ کے حکم کی روشنی میں عام انتخابات آٹھ فروری 2024 کو ہوں گے، وفاق اور چاروں صوبائی اسمبلیوں کے انتخابات ایک ہی روز ہونگے۔
اس سے قبل گزشتہ رات گئے تک صدر مملکت اور الیکشن کمیشن کے درمیان انتخابات کی تاریخ پر مشاورت کی گئی اور اٹارنی جنرل نے اس میں کردار ادا کیا۔
الیکشن کمیشن کی ٹیم ایوان صدر گئی تھی، جس کے بعد آٹھ فروری کو انتخابات کی تاریخ پر اتفاق کیا گیا، جس کے بعد ایوان صدر اور الیکشن کمیشن کی طرف سے الگ الگ اعلامئے بھی جاری کئے گئے تھے۔
