اسلام آباد: الیکشن کمیشن آف پاکستان کے ترجمان الطاف احمد خان نے بلاول بھٹو زرداری کے بیان پر وضاحت جاری کردی۔
تفصیلات کے مطابق پیپلزپارٹی کے چیئرمین بلاول بھٹو زرداری نے ڈیرہ اسماعیل خان میں ہونے والے جلسے میں تقریر کے دوران فارم 45 غائب ہونے کا الزام لگایا تھا۔
الیکشن کمیشن کے ترجمان الطاف احمد خان نے پی پی چیئرمین کے دعوے کی قلعی کھولتے ہوئے کہا ہے کہ بلاول بھٹو کے بیان میں کسی قسم کی سچائی نہیں کیونکہ فارم 45 ، 46، 48، 49 الیکشن کمیشن کی ویب سائٹ پر جاری کیے جاتے ہیں اور وہ آج بھی موجود ہیں۔ اُن کا کہنا تھا کہ ملک بھر کے پولنگ اسٹیشنز کے فارم45 غائب ہونے کا دعویٰ بالکل غلط اور بے بنیاد ہے۔
دوسری جانب خیبرپختونخوا کے الیکشن کمشنر پیر مقبول احمد نے کہا ہے کہ ضم ہونے والے قبائلی علاقوں کی 16 صوبائی نشستوں پر الیکشن کی تیاریاں جاری ہیں، بلدیاتی انتخابات بھی رواں سال کے آخر تک منعقد کیے جائیں گے۔
ترجمان الیکشن کمیشن نے وضاحت کی کہ قبائلی اضلاع میں ہونے والی پولنگ کے روز فوج کی تعیناتی کا فیصلہ واپس نہیں لیا، حساس، انتہائی حساس پولنگ اسٹیشنز کے اندر اور باہر فوج تعینات رہے گی۔
الیکشن کمیشن کے مطابق عام پولنگ اسٹیشن پر صرف باہر فورجی تعینات ہوں گے، سیکیورٹی کےپیش نظرپولنگ اسٹیشن پرحساس اور انتہائی حساس اسٹیشنز پر فوج تعینات کرنےکافیصلہ کیا تھا۔
