اسلام آباد : الیکشن کمیشن نے عام انتخابات کی ڈرافٹ پولنگ اسکیم تیار کرلی، انتخابات کیلئے ملک بھر میں تقریباً ایک لاکھ پولنگ اسٹیشنز بنائے جائیں گے۔
تفصیلات کے مطابق الیکشن کمیشن نے عام انتخابات کی تیاریاں تیز کردی ، ذرائع نے بتایا کہ الیکشن کمیشن نے عام انتخابات کی ڈرافٹ پولنگ اسکیم تیار کرلی ہے۔
ذرائع الیکشن کمیشن کا کہنا ہے کہ عام انتخابات کیلئے ملک بھر میں تقریباً ایک لاکھ پولنگ اسٹیشنز بنائے جائیں گے، ایک پولنگ اسٹیشن پر ووٹرز کی زیادہ سے زیادہ تعداد بارہ سو رکھی گئی ہے۔
ذرائع کے مطابق انتخابی شیڈول جاری ہونے پر ڈرافٹ پولنگ اسکیم ڈی آر اوز کے حوالے کی جائے گی اور سیلاب کے باعث اسکولز کی متبادل سرکاری عمارتوں میں پولنگ اسٹیشن قائم کئے جائیں گے۔
خیال رہے الیکشن کمیشن آف پاکستان کی جانب سے نئے عام انتخابات کو صاف اور شفاف بنانے کے لئے اقدامات کرنے کا سلسلہ جاری ہے۔
اس سے قبل ای سی پی کی جانب سے الیکشن رولز میں بڑی تبدیلی کی گئی تھی ، الیکشن کمیشن کی جانب سے جاری نوٹی فیکیشن کے مطابق انتخابات میں پولنگ ایجنٹس کا حلقے کا ووٹر ہونا لازم قرار دے دیا گیا اور کہا تھا کہ کسی بھی امیدوار کے پولنگ ایجنٹ کا تعلق دوسرے حلقے سے نہیں ہوسکتا۔
