اسلام آباد: بلوچستان و خیبر پختونخوا میں امن و امان کی بگڑتی صورتحال پر الیکشن کمیشن نے ہنگامی اجلاس طلب کر لیا ہے۔
الیکشن کمیشن میں کل دوپہر 3 بجے ہنگامی اجلاس ہوگا جس میں وزیر داخلہ، سیکرٹری داخلہ، چیف سیکرٹریز بلوچستان اور خیبر پختونخوا شرکت کریں گے۔
بلوچستان اور خیبر پختونخوا کے آئی جیز کے علاوہ پولیس اور حساس اداروں کے حکام بھی شریک ہوں گے۔ اجلاس میں الیکشن کمیشن کو امن و امان کی صورتحال پر بریفنگ دی جائے گی۔
آج بلوچستان کے علاقے چمن میں عوامی نیشنل پارٹی کے انتخابی دفتر پر نامعلوم مسلح افراد نے فائرنگ کی جس کے نتیجے میں رہنما ظہور احمد جاں بحق ہوئے۔
دوسری جانب، باجوڑ میں نامعلوم افراد کی فائرنگ سے پاکستان تحریک انصاف کے حمایت یافتہ آزاد امیدوار ریحان زیب جاں بحق ہوئے جو حلقہ این اے 8 سے الیکشن میں حصہ لے رہے تھے۔
