الیکشن کمیشن نے دوہزار اٹھارہ کے عام انتخابات کیلئے پولنگ اسٹیشن بڑھانے کا فیصلہ کیا ہے , ملک بھرمیں سٹوریج ھاوس اور سٹرانگ رومز اس سال کے آخر تک تیار کر لئے جائیں گے۔
تفصیلات کے مطابق 2018 کے عام انتخابات کی تیاری کے حوالے سے پلاننگ کمیٹی کا اجلاس سیکرٹری الیکشن کمیشن بابر یعقوب کی صدارت میں اسلام آباد میں ہوا، اجلاس میں تمام صوبائی الیکشن کمشنرز اور ایڈیشنل سیکرٹری شریک تھے ۔
اجلاس میں بتایا گیا کہ دو ہزار اٹھارہ کے الیکشن سے پہلے تمام سٹوریج ہاؤس اور اسٹرانگ رومز بنالئے جائیں گے، جو عام انتخابات میں سپریم کورٹ کے فیصلے کے مطابق استعمال کئے جائیں گے ۔
مزید پڑھیں : عام انتخابات 2018، ملک بھر کے70 ہزار پولنگ اسٹیشنز گوگل میپ سے منسلک
الیکشن کمیشن کے اجلاس میں پولنگ اسٹیشن کی تعداد میں اضافے کے فیصلے اور دیگر امور پر بھی تبادلہ خیال کیا گیا ۔
اجلاس کو بتایا گیا سیکرٹری الیکشن کمیشن بابر یعقوب اگلے چند دنوں میں کوہاٹ بنوں اور ڈی آئی خان کے سٹوریج ہاوس اور سٹرانگ رومز کا افتتاح کریں گے جب کہ اجلاس میں فیصلہ کیا گیا ہے کہ عام انتخابات 2018 کیلئے نئے قانون کی روشنی میں مزید پولنگ اسٹیشنز بنائے جائیں گے ، اس وقت ملک بھر میں پولنگ سٹیشنوں کی تعداد 69 ہزار ہے، جو اضافے کے بعد اسی ہزار سے تعداد بڑھ سکتی ہے۔
اجلاس میں بتایا گیا کہ الیکشن کمیشن نے آئندہ انتخابات کے 7 لاکھ عملے کے افراد کی خدمات لینے کے عمل کو حتمی شکل دے دی ہے۔
