اسلام اباد : الیکشن کمیشن کی جانب سے مخصوص نشستیں تحریک انصاف کو دیئے جانے کے حوالے سے آج حتمی فیصلے کا امکان ہے۔
تفصیلات کے مطابق الیکشن کمیشن میں مخصوص نشستوں کے معاملے پر آج پھر اجلاس ہوگا، چیف الیکشن کمشنر سکندر سلطان راجہ صدارت کریں گے۔
الیکشن کمیشن کے ممبران،حکام اور قانونی ٹیم شریک ہوگی، اجلاس میں سپریم کورٹ کے فیصلے پر عملدرآمد سے متعلق غور ہوگا اور الیکشن کمیشن کو قانونی ماہرین کے مشورے سے آگاہ کیا جائے گا۔
جس کے بعد الیکشن کمیشن کی جانب سے مخصوص نشستوں کے معاملے پر آج حتمی فیصلہ کیے جانے کا امکان ہے۔
یاد رہے اسپیکر قومی اسمبلی ایاز صادق نے الیکشن ایکٹ کے تحت مخصوص نشستیں الاٹ کرنے کے لیے چیف الیکشن کمشنر کو خط لکھا تھا، خط میں کہا تھا کہ پارلیمنٹ نے الیکشن ایکٹ منظورکیا جو صدر کے دستخط کے بعد نافذ ہوگیا، الیکشن کمیشن پارلیمنٹ کے قوانین پرعمل کرے، الیکشن ایکٹ کے تحت مخصوص نشستیں الاٹ کی جائیں۔
واضح رہے 12 جولائی کو سپریم کورٹ نے سنی اتحاد کونسل کی مخصوص نشستوں سے متعلق درخواست پر محفوظ فیصلہ سناتے ہوئے الیکشن کمیشن اور پشاور ہائیکورٹ کے فیصلے کو کالعدم قرار دیا تھا اور مخصوص نشستیں تحریک انصاف کو دینے کا حکم دیا تھا۔
گزشتہ دنوں سپریم کورٹ کے اکثریتی فیصلہ دینے والے ججوں نے وضاحتی فیصلے میں کہا تھا کہ 12 جولائی کے فیصلے میں کوئی ابہام نہیں ہے، سپریم کورٹ کا 12 جولائی کا شارٹ آرڈر بہت واضح ہے اور الیکشن کمیشن نے اس حکم کو غیر ضروری طور پر پیچیدہ بنایا ہے۔
وضاحتی بیان میں حکم دیا تھا کہ فیصلے پر عملدرآمد نہ کرنے کے سنگین نتائج ہوں گے۔
