لاہور: پاکستان مسلم لیگ ن کی جانب سے وزیر اعلیٰ پنجاب پرویز الہٰی کو ساتھ ملانے کی کوششیں عروج پر ہیں، تاہم اس بار ن لیگ کو اس سلسلے میں گارنٹیاں بھی چاہیئں۔
تفصیلات کے مطابق ذرائع نے بتایا ہے کہ مسلم لیگ ن پرویز الہٰی کو ساتھ ملانے کی کوششوں کے ساتھ گارنٹیاں بھی مانگ رہی ہے، ن لیگ نے چوہدری شجاعت سمیت چند شخصیات کو پرویز الہٰی کی گارنٹی دینے کا کہا ہے۔
ذرائع ق لیگ کا کہنا ہے کہ سالک حسین اور طارق بشیر چیمہ نے گارنٹی کے لیے وقت مانگا ہے، اور کہا ہے کہ پرویز الہٰی کی گارنٹی تو دے سکتے ہیں لیکن مونس الہٰی کی گارنٹی مشکل ہے۔
ادھر مسلم لیگ ن کے رہنما نے کہا ہے کہ اگر پرویزالہٰی مان گئے اور گارنٹی بھی ملی تو انھیں وزیر اعلیٰ برقرار رکھا جائے گا، چوں کہ مونس الہٰی تحریک انصاف کے ساتھ ہی رہنا چاہتے ہیں، اس لیے آصف زرداری بھی اس مرتبہ گارنٹی کے بغیر اعتماد نہیں کر رہے ہیں۔
ذرائع کے مطابق گورنر کی جانب سے اعتماد کے ووٹ اور عدم اعتماد سمیت سارے آپشن استعمال ہوں گے، وزیر اعظم شہباز شریف نے حتمی فیصلے کے لیے ذیلی کمیٹی بنا دی ہے، جس میں سعد رفیق، طارق بشیر چیمہ، حسن مرتضیٰ، عطا تارڑ اور سالک حسین شامل ہیں۔
یہ کمیٹی فیصلہ کرے گی کہ کون سا آپشن پہلے اور کب استعمال کرنا ہے۔
