لاہور: نیوزی لینڈ کرکٹ بورڈ نے دورہ ری شیڈول کرنے کیلئے پاکستان کرکٹ بورڈ(پی سی بی) کے چیئرمین رمیز راجہ سے رابطہ کرلیا، اس ضمن میں جلد فیصلہ متوقع ہے۔
کیوی میڈیا کے مطابق نیوزی لینڈ، پاکستان سے دورہ ری شیڈول کرنے کی کوششیں کررہا ہے، چیئرمین پی سی بی رمیزراجہ سے نیوزی لینڈ کرکٹ بورڈ کے سربراہ ڈیوڈ وائٹ نے رابطہ کیا، اس دوران دورے سے متعلق بات چیت ہوئی، نیوزی لینڈ کرکٹ بورڈ کا کہنا ہے پاکستان سے دورہ ری شیڈول کرنے پر بات کررہے ہیں۔
نیوزی لینڈ کی میڈیا کا کہنا ہے کہ فیوچر ٹور پروگرام دوہزار تیئس سے پہلے دورہ ری شیڈول ہوسکتا ہے، دورہ ری شیڈول کے حوالے سے ایک ہفتے میں فیصلہ متوقع ہے۔
خیال رہے کہ نیوزی لینڈ کی ٹیم سیکیورٹی خدشات پر دورہ ختم کرکے واپس چلی گئی تھی۔
دوسری جانب نیوزی لینڈ کے اسٹار بیٹسمین مارٹن گپٹل نے بھی دورہ پاکستان کی منسوخی پر مایوسی کا اظہار کیا ہے۔ کھلاڑی کا کہنا ہے کہ پاکستان سے میچز ہو جاتے تو تیاری کا اچھا موقع مل جاتا۔ وہ پاکستان کے خلاف میچ کے منتظر تھے لیکن فیصلے سے مایوسی ہوئی۔
یاد رہے کہ گزشتہ روز وفاقی وزیر اطلاعات و نشریات فواد چوہدری نے بھی کہا تھا کہ نیوزی لینڈ کی ٹیم نے پاکستان آنے کی خواہش مند ہے جبکہ انگلینڈ نے بھی سیریز کنفرم کی ہے۔
