قاہرہ: مصر کی حکومت نے اعلان کیا ہے کہ مصر کے تمام شہریوں کو کرونا وائرس ویکسین مفت فراہم کی جائے گی، مصر نے چینی ساختہ کرونا وائرس ویکسین حاصل کی ہے۔
بین الاقوامی میڈیا رپورٹ کے مطابق مصر کی وزیر صحت ہالہ زید نے پریس کانفرنس کرتے ہوئے کہا کہ مصری شہریوں کو کرونا وائرس کے خلاف چین کی ویکسین مفت فراہم کی جائے گی۔
مصری اور متحدہ عرب امارات کے عہدیداروں کا کہنا ہے کہ قاہرہ میں کلینیکل ٹرائلز مکمل کرنے کے بعد کرونا وائرس کے خلاف سائنو فرم ویکسین کی افادیت کا تناسب 86 فیصد تک ظاہر کیا گیا ہے۔
مصر میں چین کے سفیر لیاؤ لی کیانگ اور مصر میں امارات کی قائم مقام سفیر مریم الکعبی متحدہ عرب امارات سے قاہرہ کے انٹرنیشنل ائیرپورٹ پر کرونا ویکسین کی پہلی کھیپ پہنچنے پر وزیر صحت کے ہمراہ موجود تھیں۔
اس موقع پر مصری وزیر صحت ہالہ زید کا کہنا ہے کہ حکومت نے مزید کرونا ویکسین کی فراہمی کو محفوظ بنانے کے لیے ویکسین و حفاظتی ٹیکہ جات کے عالمی اتحاد کے ساتھ معاہدہ کیا ہے۔
وزیر صحت کا کہنا تھا کہ کرونا کے مریضوں اور دیگر مخصوص اسپتالوں میں طبی عملے کو ترجیحی بنیادوں پر چینی ویکسین دی جائے گی۔ اس کے ساتھ ساتھ کینسر یا گردے فیل ہونے والے مریضوں، عمر رسیدہ افراد اور دائمی بیماریوں میں مبتلا مریضوں کو بھی ویکسین دینے میں ترجیح دی جائے گی۔
خیال رہے کہ مصر میں گزشتہ 24 گھنٹوں کے دوران کرونا وائرس کے 445 کیسز سامنے آئے ہیں جبکہ مزید 22 اموات بھی ریکارڈ کی گئی ہیں، اب تک مصر میں مریضوں کی کل تعداد بڑھ کر 1 لاکھ 20 ہزار 147 ہوگئی ہے۔
