پشاور: خیبر پختون خوا میںفوڈ سیفٹی اتھارٹی نے غیر معیاری بیکریوں کے خلاف کریک ڈاؤن شروع کر دیا ہے، جس میں 20 سے زائد بیکریاں سیل اور متعدد پر جرمانے عائد کر دیے گئے۔
تفصیلات کے مطابق فوڈ سیفٹی اتھارٹی نے کہا ہے کہ سوات کے علاقے خوازہ خیلہ میں کپڑوں کا رنگ استعمال کرنے اور ناقص صفائی پر 5 بیکری یونٹس سیل کر دیے گئے، سوات میں دیگر بیکری یونٹس سے سینکڑوں کلو غیر معیاری مٹھائیاں بھی تلف کی گئیں، اور جرمانے عائد کیے گئے ہیں۔
فوڈ سیفٹی اتھارٹی کے مطابق ہنگو ٹل میں بیکری یونٹ سے 1300 کلو غیر معیاری مٹھائیاں برآمد ہوئیں، جس پر یونٹ کو سیل کر دیا گیا، بنوں کے مختلف علاقوں میں نان فوڈ گریڈ کلر کے استعمال اور حفظان صحت کے اصولوں کی خلاف ورزی پر 4 بیکری یونٹ سیل کر دیے گئے۔
ضلع خیبر میں کارروائی کے دوران 3 بیکری یونٹس سیل کیے گئے، ایبٹ آباد اور پارہ چنار میں غیر معیاری بیکری پراڈکٹس برآمد ہونے پر 2، 2 بیکری یونٹ سیل کیے گئے۔
فوڈ سیفٹی اتھارٹی کے مطابق ہری پور میں بھی مضر صحت رنگوں کے استعمال پر بیکری یونٹ سیل کیا گیا، جب کہ 500 کلو سے زائد غیر معیاری مٹھائیاں برآمد کر کے تلف کی گئیں۔
چارسدہ اور مردان میں ایک ایک بیکری یونٹ سیل کیا گیا، لوئر دیر لال قلعہ میں بیکری سے سینکڑوں کلو مضر صحت مٹھائیاں برآمد ہوئیں جس پر اس یونٹ کو بھی سیل کر دیا گیا ہے۔
