کراچی : شہر قائد میں نماز عیدالفطر کا سب سے بڑا اجتماع عیدگاہ گراؤنڈ ناظم آباد میں ہوگا، نمازعید کے بعد ملکی سلامتی امن اور اتحاد کے لیے خصوصی دعا کی جائے گی۔
ا ےآر وائی نیوز کی رپورٹ کے مطابق عیدگاہ گراؤنڈ ناظم آباد میں عیدالفطر کی نماز مفتی اعظم پاکستان مفتی تقی عثمانی کی اقتدا میں ادا کی جائے گی۔
رپورٹ کے مطابق گورنر سندھ کامران خان ٹیسوری عید کی نماز گورنر ہاؤس میں ادا کریں گے، گورنرہاؤس میں عید الفطر کی نماز ساڑھے 7بجے ادا کی جائے گی۔
متحدہ قومی موومنٹ کے کنوینئر سید خالد مقبول صدیقی بھی گورنر ہاؤس میں گورنر سندھ کے ہمراہ نماز عید ادا کریں گے۔
اس کے علاوہ مفتی منیب الرحمان نماز عیدالفطر ٹی گراؤنڈ فیڈرل بی ایریا میں سوا7بجے پڑھائیں گے، مفتی نعمان نعیم کی اقتدا میں نماز عید مرکزی جامع مسجد میں6:40 پر ادا کی جائے گی۔
دوسری جانب اسلام آباد کی فیصل مسجد میں نمازِ عیدالفطر صبح 7:30 بجے ادا کی جائے گی۔ بین الاقوامی اسلامی یونیورسٹی اسلام آباد کی دعوہ اکیڈمی کی جانب سے جاری کردہ تفصیلات کے مطابق دعوہ اکیڈمی کے ڈائریکٹر جنرل پروفیسر ڈاکٹر محمد الیاس نمازِ عید کی امامت کریں گے اور عیدالفطر کا خطبہ پیش کریں گے۔
