اسلام آباد : پاکستان میں عید الاضحٰی کے موقع پر کتنی چھٹیاں ملنے کا امکان ہے حتمی اعلان حکومت کی جانب سے کیا جائے گا۔
تفصیلات کے مطابق پاکستان میں ذوالحج کا چاند نظر آگیا ہے اور عید الاضحیٰ 2025 7 جون کو منائی جائے گی جب کہ تعطیلات کا حتمی شیڈول کا اعلان نہیں کیا گیا۔
سرکاری اور نجی ملازمین عید کی تعطیلات کے حوالے سے باضابطہ نوٹیفکیشن جاری کرنے کے لیے حکومت کی طرف دیکھ رہے ہیں تاکہ وہ اس کے مطابق اپنی مصروفیات کا منصوبہ بنا سکیں۔
سال 2025 کے عام تعطیلات کے کیلنڈر کے مطابق عید کے موقع پر 7 سے 9 جون تک تین تعطیلات ہوں گی۔ تاہم وفاقی حکومت کی جانب سے باقاعدہ نوٹیفکیشن جاری ہونا باقی ہے۔
اطلاعات کے مطابق عیدالاضحیٰ کی تعطیلات کا فیصلہ وزیر اعظم شہباز شریف کے غیر ملکی دورے سے واپسی پر کیا جائے گا۔
مزید پڑھیں : متحدہ عرب امارات میں عید الاضحیٰ کی تعطیلات کا اعلان
توقع ہے کہ وزیراعظم تاجکستان کا دو روزہ دورہ مکمل کرنے کے بعد آج (جمعہ) کو واپس پاکستان پہنچیں گے۔
ایک روز قبل وزیر اعظم شہباز شریف دو روزہ دورے پر دوشنبہ پہنچے جہاں ائیرپورٹ پر تاجک وزیر اعظم کوخیر رسول زادہ، نائب وزیر خارجہ شریف زادہ فرخ حمید الدین، پاکستان میں تاجکستان کے سفیر یوسف شریف زادہ اور تاجکستان میں پاکستان کے سفیر محمد سعید سرور نے ان کا پرتپاک استقبال کیا۔
دورہ تاجکستان کے دوران وزیراعظم شہباز شریف نے تاجکستان کے صدر امام علی رحمان سے دوطرفہ ملاقات کی، جس میں مختلف شعبوں میں تعاون پر تبادلہ خیال کیا گیا۔
