اسلام آباد : وزیرداخلہ اعجاز شاہ نے کہا ہے کہ امن کو خراب کرنے والی بیرونی سازش کو کامیاب نہیں ہونے دیں گے، بھارت کا گوردوارہ ننکانہ صاحب واقعے کو غلط رنگ دینا نہایت افسوسناک ہے۔
اپنے ایک بیان میں ان کا کہنا تھا کہ ننکانہ صاحب میں معمولات زندگی معمول کے مطابق ہیں، ننکانہ صاحب مذہبی ہم آہنگی کا مرکز ہے، امن اور مذہبی ہم آہنگی کی اس سے بہتر مثال نہیں ملتی۔
وزیر داخلہ کا کہنا تھا کہ امن کو خراب کرنے والی بیرونی سازش کو کامیاب نہیں ہونے دینگے، گوردوارہ ننکانہ صاحب میں ایک مقامی مسئلے کو غلط رنگ دیا گیا، چند مقامی لوگوں نے گرفتار افراد کی رہائی کیلئے پولیس کیخلاف احتجاج کیا تھا۔
اعجاز شاہ نے کہا کہ واقعہ میں کوئی جانی یا مالی نقصان نہیں ہوا، ضلعی انتظامیہ سے رابطے میں ہیں، معاملات حل ہو چکے ہیں، بھارت کا واقعے کو غلط رنگ دینا نہایت افسوسناک ہے، گرو گوبن سنگھ کے جنم دن کی تقریبات معمول کے مطابق جاری ہیں۔
