لاہور : جوہر ٹاؤن میں ڈاکو اسلحے کے زور پر بزرگ خاتون سے ایک لاکھ 90 ہزار روپے لوٹ کر فرار ہوگئے، واقعے کا مقدمہ متاثرہ خاتون کے بیٹے نے درج کرادیا۔
تفصیلات کے مطابق لاہور کے علاقے جوہر ٹاؤن میں بزرگ خاتون سے ڈکیتی کی واردات ہوئی، جس میں ڈاکو اسلحے کے زور پر بزرگ خاتون سے نقدی لے اڑے۔
فوٹیج میں دو ڈاکوؤں کو بزرگ خاتون سے واردات کرتے دیکھا جا سکتا ہے، دو موٹرسائیکلوں پر سوار ڈاکوؤں نے رکشے میں بیٹھی خاتون سے لوٹ مار کی۔
واقعے کا مقدمہ متاثرہ خاتون کے بیٹے طارق کی مدعیت میں درج کرلیا گیا ہے ، مقدمے کے متن کے مطابق والدہ بینک سے غیرملکی کرنسی تبدیل کرا کر باہر رکشے میں بیٹھی تھیں کہ ڈاکوخاتون سے ایک لاکھ نوے ہزار روپے لوٹ کر فرار ہوئے۔
یاد رہے لاہور کے تھانہ نصیرآباد کی حدود میں ڈاکو نے شہری سے ایک کروڑ 32 لاکھ سے زائد کی رقم لوٹ کر فرار ہوگئے تھے۔
شہری سونے کا کاروبار کرتا ہے سونا دے کر نقد رقم لے کر جا رہا تھا، 2 موٹر سائیکل سوار ملزمان گن پوائنٹ پر کیش چھین لیا تھا۔
