کراچی : الیکشن کمیشن پاکستان نے حلیم عادل شیخ کے پروڈکشن آرڈر جاری نہ کرنے کا فیصلہ کرتے ہوئے کہا ریجنل الیکشن آفیسر حلیم عادل شیخ سے سینیٹ امیدوار کے تائید کنندہ کی حیثیت سے تصدیق کرے گا۔
تفصیلات کے مطابق حلیم عادل شیخ کے پروڈکشن آرڈر جاری کرنے سےمتعلق درخواست پر الیکشن کمیشن سندھ نے مرکزی الیکشن کمیشن سےرائے مانگ لی اور درخواست مرکزی الیکشن کمیشن کو بھیج دی۔
الیکشن کمیشن سندھ کی جانب سے درخواست میں کہا گیا کہ پروڈکشن آرڈر جاری کیے جائیں یا ان کےپاس جاکر تصدیق کی جائے؟
بعد ازاں الیکشن کمیشن پاکستان نے حلیم عادل شیخ کے پروڈکشن آرڈر جاری نہ کرنے کا فیصلہ کرتے ہوئے ریجنل الیکشن آفیسر کو تعینات کر دیا ، ریجنل الیکشن کمشنر حلیم عادل شیخ سے ملاقات کریں گے اور ان سے سینیٹ امیدوار کے تائید کنندہ کی حیثیت سے تصدیق کی جائے گی۔
دوسری جانب ایس ایس پی ملیر نے حلیم عادل شیخ کی گرفتاری کے بعد اسپیکر سندھ اسمبلی کو خط لکھا ، جس میں کہا ہے کہ حلیم عادل شیخ کے خلاف دہشتگردی سمیت دیگرمقدمات درج ہیں، مقدمات گڈاپ ،میمن گوٹھ تھانے میں درج ہیں۔
خط کی کاپی آئی جی سندھ،ایڈیشنل آئی جی کرچی ،ڈی آئی جی ایسٹ کو بھی ارسال کردی گئی ہے۔
