The news is by your side.

Advertisement

الیکشن کمیشن نے علی حیدر گیلانی کی ویڈیو کا نوٹس لے لیا

اسلام آباد: الیکشن کمیشن آف پاکستان نے علی حیدر گیلانی کی سینیٹ انتخابات سے قبل سامنے آنے والی ویڈیو کا نوٹس لے لیا۔

اے آر وائی نیوز کی رپورٹ کے مطابق الیکشن کمیشن کا کہنا ہے کہ علی حیدر گیلانی کی ویڈیو کی تحقیقات میرٹ پر ہوں گی، واضح رہے کہ علی حیدر گیلانی کی ووٹ ضائع کرنے کی مبینہ ویڈیو سامنے آئی تھی۔

ذرائع کا کہنا ہے کہ تحقیقات ویجی لینس کمیٹی کے سپرد بھی کی جاسکتی ہیں۔

دوسری جانب الیکشن کمیشن نے فواد چوہدری کی الیکشن کمیشن میں کسی افسر کے موجود نہ ہونے سے متعلق بیان کی تردید کردی۔

ترجمان الیکشن کمیشن کا کہنا ہے کہ فواد چوہدری کا الیکشن کمیشن میں کسی افسر کے نہ ہونے کا بیان غلط ہے، الیکشن کمیشن کی آر اینڈ آئی برانچ کھلی ہے اور متعلقہ افسران موجود ہیں۔

ترجمان کا کہنا ہے کہ الیکشن کمیشن نے سینیٹ انتخابات سے متعلق کنٹرول روم قائم کررکھا ہے، مانیٹرنگ، کنٹرول روم 24 گھنٹے فعال ہے۔

مزید پڑھیں: سینیٹ ووٹ‌ کی خریداری: یوسف رضا گیلانی کے بیٹے کی ویڈیو سامنے آگئی

واضح رہے کہ اس سے قبل سینیٹ الیکشن میں پاکستان ڈیموکریٹک موؤمنٹ (پی ڈی ایم) کے مشترکہ امیدوار یوسف رضا گیلانی کے بیٹے علی حیدر گیلانی کی ووٹ خریداری کی ویڈیو سامنے آئی تھی۔

ویڈیو میں علی حیدر گیلانی تحریک انصاف کے رکن اسمبلی کو ووٹ ضائع کرنے کا طریقہ بتا رہے تھے۔

مزید پڑھیں: علی حیدر گیلانی نے ویڈیو کی تصدیق کردی

بعدازاں علی حیدر گیلانی کا ویڈیو کی تصدیق کرتے ہوئے کہنا تھا کہ ہم نے ہمیشہ ضمیر کا ووٹ مانگنا ہے اور ہمیشہ ضمیر کا ہی ووٹ مانگتے ہیں، ایک دو نہیں زیادہ لوگ تھے جو ابھی نہیں بتا سکتا، پی ٹی آئی کے دوست تھے جو کہہ رہے تھے ہم حفیظ شیخ کو ووٹ نہیں دینا چاہتے، میں نے کہا آپ ووٹ ضائع کردیں نہ ہمیں جائے گا نہ انہیں جائے گا۔

علی حیدر گیلانی کا کہنا تھا کہ دوستوں نے کہا پارٹی ووٹ پر نشان لگا کر دے تو پھر کیا کریں گے، میں نے کہا آپ یوسف رضا گیلانی پر بھی نشان لگا کر ووٹ ضائع کردینا، ووٹ ضائع کرنے کا طریقہ بتایا میں نے کون سا غلط کام کیا۔

Comments

یہ بھی پڑھیں