لاہور: امیر جماعت اسلامی سراج الحق نے کہا ہے کہ ملک میں الیکشن کا متنازع ہونا بڑی بدقسمتی ہے، ملک کی خاطر ہر قسم کی قربانی دینے کو تیار ہیں۔
ان خیالات کا اظہار انہوں نے میڈیا سے گفتگو کرتے ہوئے کیا، سراج الحق کا کہنا تھا کہ نظریہ پاکستان کے تحفظ کے لیے کسی قربانی سے دریغ نہیں کریں گے، ہمیں مل کر ملکی ترقی میں اپنا حصہ ڈالنا چاہیے۔
ان کا کہنا تھا کہ ملک میں جمہوری رویوں کا فروغ چاہتے ہیں، جمہوری رویوں کے ذریعے مسائل حل کیے جاسکتے ہیں، لڑائی کے بجائے مل کر پاکستان کے مستقبل کی فکر کرنی ہے۔
امیر جماعت اسلامی کا مزید کہنا تھا کہ قومی یکجہتی کے لیے سیاسی قوتوں کو متحد ہو کر آگے بڑھنا ہوگا، ہم ملک کی بقا اور سلامتی کی خاطر ہر اقدامات کرنے کے لیے تیار ہیں۔
حکومتی قبلہ مکہ کے بجائے کسی اور طرف ہوا تو درست کردیں گے، سراج الحق
قبل ازیں سراج الحق نے 3 اگست کو صحافیوں سے گفتگو کرتے ہوئے کہا تھا کہ حکومتی قبلہ مکہ کے بجائے کسی اور طرف ہوا تو درست کردیں گے، کوئی مائی کا لعل پاکستان کو سیکولر اورلبرل ریاست نہیں بناسکتا۔
یاد رہے کہ چند روز قبل امیر جماعت اسلامی کا کہنا تھا کہ جمہوریت کے تسلسل کے لیے نئی حکومت کو کام کا موقع دینا چاہتے ہیں، ہر قسم کی کرپشن کے خاتمے کے لیے اقدامات کے منتظر ہیں۔
انھوں نے یہ بھی کہا تھا کہ نئی حکومت کے اچھے کاموں کی تعریف کریں گے، عمران خان کے اچھے کاموں کی حمایت کریں گے، جماعت اسلامی نے ہمیشہ جمہوریت کے لیے جدوجہد کی ہے۔
