امیر جماعت اسلامی کراچی حافظ نعیم الرحمان نے کہا ہے کہ انتخابی نتائج تبدیل کرنے کی کوئی سازش کامیاب نہیں ہونے دیں گے۔
کراچی میں پریس کانفرنس سے خطاب کرتے ہوئے انہوں نے کہا کہ آج کے الیکشن کے بعد طے ہوگا کہ کراچی کا میئر کس کو بننا ہے؟
حافظ نعیم نے کہا کہ نیو کراچی یوسی 13میں صبح سے مسئلہ چل رہا تھا، ایک پولنگ اسٹیشن پر منصوبہ بندی سے ہنگامہ آرائی کی گئی اور ووٹرز کو وہاں جانے نہیں دیا گیا۔
ان کا کہنا تھا کہ اگر حالات بگاڑنے میں انتظامیہ کی مدد لی گئی تو بھی احتجاج کریں گے اور انتخابی نتائج تبدیل ہونے کی کوئی سازش کامیاب نہیں ہونے دینگے۔
سب نے دیکھا کہ یوسی 13میں ان کا ایک بندہ موجود تھا، ان کو معلوم تھا کہ جماعت اسلامی کو بڑی تعداد میں ووٹ ڈالے جاچکے ہیں، ایسا نہیں ہوسکتا کہ آپ دھاندلی کریں اور ہم شور بھی نہ مچائیں۔
انہوں نے کہا کہ الیکشن کمیشن کو چاہیے کہ وہ اپنی ساکھ بحال کرے، فارم11اور12پر ابھی سے دستخط کرائے جارہے ہیں، ہم جعلی نہیں صرف اصل نتیجہ مانیں گے۔
حافظ نعیم الرحمان کا کہنا تھا کہ حکومت کو بتارہا ہوں کہ انہوں نے ڈبے بدلنے کا منصوبہ بنایا ہوا ہے، ہم آپ کے مینڈیٹ کو تسلیم کرینگے آپ بھی ہمارے مینڈیٹ کو تسلیم کریں۔
