ملتان: پیپلزپارٹی کے سینئر رہنما یوسف رضا گیلانی کا کہنا ہے کہ مستقبل چیئرمین بلاول بھٹو کا ہے۔
اے آر وائی نیوز کے مطابق پی پی رہنما یوسف رضا گیلانی نے میڈیا سے گفتگو کرتے ہوئے کہا کہ بلاول بھٹو نے پورے پاکستان کا دورہ کیا، ملتان سے اپنے منشور کا اعلان کیا، عوام نے بلاول بھٹو کے منشور کو پسند کیا ہے، عوام نے منشور سن کر ہمیں سپورٹ کیا ہے۔
انہوں نے کہا کہ پیپلزپارٹی ملک کے استحکام، معیشت کے لیے اپنا فرض نبھائے گی، جب میں وزیراعظم تھا اس وقت بھی سیاسی استحکام تھا، ہم تمام اسٹیک ہولڈرز کو ساتھ لے کر چلیں گے۔
یوسف رضا گیلانی نے کہا کہ دہشت گردی نے پھر سے سر اٹھا لیا ہے، دہشت گردی کا مقابلہ ہم نے پہلے بھی کیا تھا اب بھی کریں گے، ملکی استحکام کے لیے دہشت گردی کا مقابلہ بہت ضروری ہے۔
پی پی رہنما نے کہا کہ افغانستان میں استحکام آئے گا تو اس کا اثر پاکستان میں بھی ہوگا، ہم برادر ممالک ہیں ہمارے معاشی، سیاسی، مذہبی تعلقات ہیں، ہمیں ملک دشمن کے عزائم کو ختم کرنا ہے، ہماری فورسز نے بہت قربانیاں دی ہیں، جوانوں نے اپنا آج آپ کے کل کے لیے قربان کیا ہے۔
یوسف رضا گیلانی نے مزید کہا کہ اس وقت ہمارا مسئلہ مہنگائی اور بیروزگاری ہے، ہمیں غریبوں کو کھڑا کرنا ہے معاشی طور پر بہتر کرنا ہے۔
