اسلام آباد : الیکشن کمیشن نے پنجاب اور خیبرپختوانخوا میں انتخابات کرانے کی تیاریاں تیز کردیں ، دونوں صوبوں میں انتخابات عیدالفطر کے بعد ہونے کا امکان ہے۔
تفصیلات کے مطابق الیکشن کمیشن نے پنجاب اور خیبرپختوانخوا میں انتخابات کرانے کی تیاریاں شروع کردیں۔
ذرائع نے بتایا کہ الیکشن کمیشن کی متعلقہ ونگز کو تیاریاں تیز کرنے کی ہدایت کردی گئی ہے ، ممکنہ طور پردونوں صوبوں میں انتخابات کی تاریخ عیدالفطر کے بعد ہوگی۔
ذرائع کا کہنا تھا کہ اعلان کردہ پولنگ ڈےمیں ردوبدل کا اختیارالیکشن کمیشن کو نہیں ہوگا، انتخابی شیڈول 54دن پرمحیط ہوگا اور اداروں کے عدم تعاون پرآرٹیکل 220 کا سہارا لیا جائے۔
ذرائع نے کہا ہے کہ گزشتہ روز الیکشن کمیشن نے عدالتی احکامات پر من وعن عملدرآمد کا فیصلہ کیا تھا، الیکشن کمیشن کی جانب سے صدر اور گورنر کیساتھ دوبارہ مشاورت کیلئے خط بھی آج لکھا جائے گا۔
یاد رہے سپریم کورٹ نے الیکشن کمیشن کو پنجاب اور خیبر پختونخوا میں نوے روز میں انتخابات کرانے کا حکم دے دیا ہے۔
سپریم کورٹ نے فیصلہ تین دو کی اکثریت سے سنایا، عدالتی فیصلے میں کہا گیا ہے کہ پارلیمانی جمہوریت میں انتخابات اہم عنصر ہیں، اسمبلی کی تحلیل کے بعد نوے روزمیں الیکشن ہونا لازم ہے۔
