اسلام آباد : الیکشن کمیشن آف پاکستان کی جانب سے مسلم لیگ (ن) کی انتخابی نشانات تبدیل کرانے کی درخواست مسترد کردی گئی۔
اس حوالے سے ذرائع کا کہنا ہے کہ مسلم لیگ نون نے 4 انتخابی نشانات تبدیل کرانے کیلئے الیکشن کمیشن کو درخواست دی تھی جسے مسترد کردیا گیا۔
درخواست میں مؤقف اختیار کیا گیا تھا کہ ریچھ، بکری، ہرن اور گائے سمیت 4 انتخابی نشان شیر کے نشان سے مماثلت رکھتے ہیں جس کی وجہ سے ہمارے ووٹرز کو الیکشن کے دن مشکلات کا سامنا ہوگا۔
درخواست میں الیکشن کمیشن استدعا کی گئی تھی کہ لہٰذا جانوروں کے یہ چاروں نشانات انتخابی نشانات کی فہرست سے نکالے جائیں۔
درخواست کے جواب میں الیکشن کمیشن کا کہنا ہے کہ مسلم لیگ ن کے انتخابی نشانات پر اعتراضات جائز نہیں ہیں اور چاروں جانور نظر آنے میں واضح طور پر مختلف ہیں جس کے بعد الیکشن کمیشن نے مسلم لیگ ن کے اعتراضات نامناسب سمجھتے ہوئے مسترد کر دیے۔
