کراچی: نیشنل پاور ریگولیٹری اتھارٹی نے ماہ اپریل کے لیے بجلی صارفین کو 1.67 روپے ریلیف دینے کا اعلان کیا ہے۔
نیپرا نے اپریل کے مہینے کے لیے فیول چارجز ایڈجسمنٹ (ایف سی اے) کی درخواست پر کے الیکٹرک صارفین کو 1.67 روپے فی یونٹ ریلیف دیا ہے، صارفین کو کمی کا فائدہ جولائی کے بل میں دیا جائے گا۔
اس سے قبل نیپرا نے جولائی 2023 کے لیے 1.7111 روپے اور ستمبر 2023 کے لیے 1.3946 روپے فی یونٹ صارفین سے وصول کرنے کا فیصلہ دیا تھا۔
بجلی میں استعمال ہونے والے ایندھن کی عالمی سطح پر قیمتوں میں اتار چڑھاؤ کی وجہ سے ایف سی اے یوٹیلٹیز کو متاثر کرتا ہے۔ نیپرا کی منظوری کے بعد یہ لاگت صارفین سے وصول یا ریلیف کی صورت میں منتقل کیا جاتا ہے۔
کے الیکٹرک کا تعارف
کے الیکٹرک ایک پبلک لسٹڈ کمپنی ہے، جس کا قیام 1913 میں عمل میں آیا اور کے ای ایس سی (KESC) کے نام سے پاکستان بننے کے بعد بھی اس کی خدمات جاری رہیں، کے الیکٹرک کراچی اور اُس کے ملحقہ علاقوں کو بجلی فراہم کرتی ہے۔
کمپنی کے 66.4 فیصد اکثریتی حصص (شیئرز) کے ای ایس پاور کی ملکیت ہیں، جو سرمایہ کاروں کا ایک کنسورشیم ہے، جس میں سعودی عرب کی الجومعہ پاور لمیٹڈ، کویت کا نیشنل انڈسٹریز گروپ (ہولڈنگ) اور انفرا اسٹرکچر اینڈ گروتھ کیپٹل فنڈ (آئی جی سی ایف) شامل ہیں۔
کے الیکٹرک میں حکومت پاکستان کے بھی 24.36 فیصد اقلیتی حصص ہیں جبکہ بقیہ حصص فری فلوٹ شیئرز کے طور پر درج ہیں۔
