نیشنل الیکٹرک پاور ریگولیٹری اتھارٹی (نیپرا) کی جانب سے برآمدی شعبے کے لئے بجلی 12 روپے 13پیسے فی یونٹ مہنگی کرنے کی منظوری کے بعد عوام کو آئندہ ماہ بڑا جھٹکا لگے گا۔
عالمی مالیاتی فنڈ (آئی ایم ایف) کے دباؤ پر حکومت کے سخت فیصلوں کے نتیجے مارچ میں عوام بجلی بلوں پر اضافی سرچارج کی مد میں بھاری بل بھریں گے، برآمدی شعبہ ساٹھ فیصد سے زائد جبکہ زرعی صارفین کو پچاس فیصد سے زیادہ بلز ادا کرنا ہوگا۔
برآمدی شعبے اور کسانوں کے لئے بجلی پر 65 ارب روپے کی سبسڈی ختم کردی گئی ہے اور کسانوں کے لئے بجلی 3 روپے 60 پیسے فی یونٹ مہنگی کرنے بھی کی منظوری کے بعد مہنگائی کا ایک اور طوفان سر پہ کھڑا ہے۔
سبسڈیز کے خاتمے کے بعد برآمدی شعبے کا ٹیرف19 روپے99پیسے فی یونٹ سے بڑھ کر32 روپے12پیسے ہوگیا۔ زرعی صارفین کی3 روپے 60پیسے سبسڈی ختم، مؤخر ادائیگیوں کی مد میں زرعی صارفین تین روپے جبکہ پاور ہولڈنگ کمپنی کے سود کی مد میں عائد سرچارج کے عوض فی یونٹ تینتالیس پیسے ادا کریں گے۔
مزید پڑھیں : بجلی صارفین پر 335 ارب روپے کا اضافی بوجھ ڈالنے کی تیاری
اس کے علاوہ 100یونٹ والے گھریلو صارفین کو سرچارج کی مد میں2روپے75پیسے اضافی ادا کرنا ہوں گے۔ جبکہ400 یونٹ والے صارفین کو تین روپے82پیسے اضافی سرچارج کے ساتھ مؤخر ادائیگیوں کا بوجھ بھی برداشت کرنا ہوگا۔
