کراچی : شہر قائد کے علاوہ ملک بھر کے بجلی صارفین کیلئے ماہانہ ایڈجسٹمنٹ میں ایک بار پھر بجلی سستی ہونے کا امکان ہے۔
اس حوالے سے ذرائع کا کہنا ہے کہ نیشنل الیکٹرک پاور ریگولیٹری اتھارٹی (نیپرا) کی جانب سے کراچی کے بجلی صارفین کے علاوہ پورے ملک کے لیے ماہانہ ایڈجسٹمنٹ کی مد میں فی یونٹ بجلی مزید 63 پیسے کمی کرنے کا امکان ہے۔
ذرائع کے مطابق سی پی پی اے نے نیپرا سے بجلی کی قیمت میں63پیسے فی یونٹ کمی کی درخواست کی ہے، اس سلسلے میں نومبر2024 کی ماہانہ ایڈجسٹمنٹ کی درخواست نیپرا میں جمع کرادی گئی ہے۔
ذرائع کا کہنا ہے کہ نیپرا کی جانب سے ماہانہ ایڈجسٹمنٹ کی درخواست پر31دسمبر کو سماعت ہوگی، سی پی پی اے کی ماہانہ ایڈجسٹمنٹ کا اطلاق کراچی کے کےالیکٹرک صارفین پر نہیں ہوگا۔
ذرائع کے مطابق نیپرا کی منظوری کے بعد من وعن کمی کا بجلی صارفین کو 4 ارب88کروڑ روپے کا ریلیف ملے گا۔ مسلسل پانچویں بار ماہانہ ایڈجسٹمنٹ میں بجلی کی قیمت میں کمی کا امکان ہے۔
واضح رہے کہ اس سے قبل نیپرا ماہانہ ایڈجسٹمنٹ میں مسلسل 4 بار بجلی کی قیمت میں کمی کرچکا ہے، نیپرا نے اکتوبر کی ایڈجسٹمنٹ میں بجلی ایک روپے14پیسے فی یونٹ سستی کی تھی، اکتوبر کی ایڈجسٹمنٹ کا ریلیف صارفین کو رواں ماہ کے بلوں میں دیا جارہا ہے۔
