اب لوڈ شیڈنگ میں بھی بجلی کے بغیر چلنے والی واشنگ مشین سے کپڑے آرام سے دھلیں گے، پیڈل کے ذریعے چلنے والی واشنگ مشین تیار کرلی گئی، جسے بہ آسانی کہیں لے جایا جاسکتا ہے۔
تفصیلات کے مطابق ٹیکنالوجی کے ماہرین نے ایک ایسی انوکھی واشنگ مشین تیار کی ہے جسے چلانے کے لئے برقی توانی کی ضرورت نہیں، اسے پیڈل کے زریعے چلایا جاسکتا ہے۔
بالٹی نما اس انوکھی واشنگ مشین کو ’’ڈرمی‘‘ کا نام دیا گیا ہے اور اس کا وزن 2.25 کلوگرام ہے۔
اس مشین میں کپڑے دھونا بہت آسان ہے، کپڑے دھونے کے لئے اس میں حسب ضرورت پانی ڈالنے کے بعد کپڑے مشین میں ڈالیں پھر اس کے اوپر گھومنے والے بلیڈ نما ڈسک رکھیں اور ڈٹرجنٹ ڈال کر مشین کا ڈھکن بند کردیں اور کسی آرام دہ کرسی پر بیٹھ کر سلائی مشین کی طرح پیڈل دباتے رہیں۔
مشین کے اندر کا ڈرم تیزی سے گھومتے ہوئے کپڑوں کی دھلائی شروع کردے گا، یہ ہی نہیں بلکہ پانی نکال کر اسی کے ذریعے کپڑوں کو سُکھایا بھی جاسکتا ہے۔
خاص بات یہ ہے کہ مختصر جسامت اور کم وزن کی وجہ سے اسے پکنک وغیرہ پر بھی ساتھ لے جایا سکتا ہے۔
