اسلام آباد : مالی سال 23-2022 میں مہنگے ذرائع سے سب سے زیادہ بجلی پیدا کرنے کا انکشاف سامنے آیا، ایک سال میں تھرمل ذرائع سے 58 فیصد پانی سے 18 فیصد بجلی پیدا کی گئی۔
تفصیلات کے مطابق نیپرا نے پاور پلانٹس کی کارکردگی جائزہ رپورٹ 23-2022جاری کردی ، جس میں بتایا گیا کہ مالی سال23-2022میں مہنگے ذرائع سے سب سے زیادہ بجلی پیدا کی گئی۔
رپورٹ میں بتایا گیا کہ ایک سال میں تھرمل ذرائع سے 58 فیصد پانی سے 18 فیصد بجلی پیدا کی گئی جبکہ متبادل ذرائع سے 4فیصد اور جوہری ایندھن سے 20 فیصد بجلی پیدا کی گئی۔
نیپرا رپورٹ میں کہنا تھا کہ مختلف وجوہات کی بنا پر پن بجلی پاورپلانٹس سے پیداوار انتہائی کم رہی، پانی کے اخراج کی ناقص حکمت عملی سے پن بجلی کی پیداوار کم رہی۔
رپورٹ کے مطابق ونڈپاورپلانٹس کی دستیابی کا دورانیہ 82 سے 100 فیصد تک رہا جبکہ سولر پاور پلانٹس کی دستیابی کا دورانیہ 49.3 سے 98.7 فیصد رہا۔
