کراچی کے شہریوں کے لیے بجلی سستی ہونے کا امکان ہے۔
اے آر وائی نیوز کے مطابق کے الیکٹرک نے بجلی 4 روپے 95 پیسے فی یونٹ سستی کرنے کی درخواست دائر کردی ہے۔
نیپرا اتھارٹی 26 فروری کو درخواست سماعت کرے گی۔اگر نیپرا من و عن منظوری دیتا ہے تو کراچی کے عوام کو 4 ارب 94 کروڑ روپے کا ریلیف ملے گا۔
چند روز قبل بھی کراچی سمیت ملک بھر کے لیے سہ ماہی ایڈجسٹمنٹ میں بجلی سستی ہونے کا امکان ظاہر کیا گیا تھا۔
واضح رہے کہ کراچی کے شہریوں کیلئے دسمبر میں دیے گئے بجلی بلوں پر بڑے ریلیف کا امکان ظاہر کیا جارہا ہے۔
بجلی صارفین کو 52 ارب 12 کروڑ روپے کے ریلیف کے لیے درخواست نیپرا میں دائر کی گئی تھی، درخواست رواں مالی سال کی دوسری سہ ماہی ایڈجسٹمنٹ کی مد میں جمع کرائی گئی تھی۔
تقسیم کار کمپنیوں نے بجلی تقریباً 2 روپے فی یونٹ سستی کرنے کیلئے نیپرا سے رجوع کیا تھا، نیپرا کا کہنا تھا کہ اکتوبر تا دسمبر 2024 کی سہ ماہی ایڈجسٹمنٹ کا اطلاق کے الیکٹرک پر بھی ہوگا۔
نیپرا کے مطابق ڈسکوز کی درخواست پر سماعت 12 فروری کو ہو گی، کیپیسٹی چارجز کی مد میں 50 ارب 66 کروڑ روپے کی کمی مانگی گئی ہے۔
ٹرانسمیشن اینڈ ڈسٹری بیوشن نقصانات میں 2 ارب 66 کروڑ روپے کی کمی کی درخواست کی گئی تھی، نیپرا کا کہنا تھا کہ آپریشنز اینڈ مینٹیننس کی مد میں 2 ارب 69 کروڑ روپے مانگے گئے ہیں۔
