کراچی: کے الیکٹرک نے کراچی والوں کے لیے سہ ماہی ایڈجسٹمنٹ کی مد میں فی یونٹ ہوش ربا اضافے کی درخواست پر کہا ہے کہ اس کی وجہ ملک بھر میں نرخ برابر رکھنا ہے۔
تفصیلات کے مطابق ترجمان کے الیکٹرک نے بیان جاری کرتے ہوئے کہا ہے کہ بجلی کی قیمتوں پر موجودہ درخواست پاور ڈویژن کی جانب سے ملک میں نرخ برابر رکھنے کے لیے کی گئی ہے۔
ترجمان نے کہا بجلی نرخوں اور ٹیکسز کا تعین کرنے کی ذمہ داری حکومت کے پاس ہے، انفرادی بجلی تقسیم کار کمپنیاں بجلی کے نرخ میں تبدیلی کرنے کا اختیار نہیں رکھتیں۔
ترجمان کے مطابق نرخ میں رد و بدل اور اس کے اطلاق کے لیے سماعت کے بعد حتمی نوٹیفکیشن جاری کیا جائے گا، اور ملکی قوانین کے تحت کے الیکٹرک اس پر عمل درآمد کرنے کا پابند ہوگا۔
کے الیکٹرک صارفین کیلئے بری خبر، فی یونٹ بڑے اضافے کا امکان
واضح رہے کہ کے الیکٹرک نے سہ ماہی ایڈجسٹمنٹ کی مد میں نیپرا میں درخواست دائر کی ہے کہ بجلی مزید 10 روپے 32 پیسے فی یونٹ مہنگی کی جائے، درخواست منظور ہونے پر یہ وصولیاں ستمبر، اکتوبر اور نومبر 2023 میں کی جائیں گی۔
