کسی شخص کے ساتھ رہتے اور وقت گزارتے ہوئے اس سے انسیت ہوجانا ایک فطری عمل ہے اور اگر معاملہ جانوروں کا ہو تو ان کی محبت اور وفاداری میں کوئی شک و شبہ نہیں۔
تھائی لینڈ میں ایک ہاتھی نے بھی اپنے نگران کی موت پر اسے انوکھا خراج عقیدت پیش کیا جسے دیکھ کر وہاں موجود افراد کی آنکھیں نم ہوگئیں۔
پلائی پینم نامی 20 سالہ یہ ہاتھی 10 سال قبل سرکس کے لیے ایک شخص کے زیر نگرانی تھا۔ دونوں نے کئی سال ایک دوسرے کے ساتھ گزارے۔
مزید پڑھیں: ہاتھیوں کا جوڑا بچے کو بچانے کے لیے جان پر کھیل گیا
اس دوران نگران کا بیٹا بھی ہاتھی سے مانوس ہوگیا۔ کچھ عرصہ بعد ہاتھی کو قریبی جنگل میں چھوڑ دیا گیا۔
چند روز قبل ایک ٹریفک حادثے میں نگران کی موت واقع ہوگئی۔
آخری رسومات کے موقع پر نگران کے بیٹے کو ہاتھی کی یاد آئی تو وہ اسے قریبی جنگل میں ڈھونڈنے چلا گیا جہاں ہاتھی اسے ایک درخت کے ساتھ بیٹھا نظر آیا۔
نگران کا بیٹا اسے اپنے ساتھ والد کے تابوت کے قریب لایا، اور مانوس خوشبو سونگھتے ہی جیسے ہاتھی کو کچھ سمجھانے کی ضرورت نہ رہی، وہ تیزی سے اپنے نگران کے تابوت کے قریب پہنچا اور اسے گھٹنوں کے بل جھک کر تعظیم دی۔
نگران کو تعظیم پیش کرنے کے بعد ہاتھی دل گرفتہ سا واپس جنگل کی طرف روانہ ہوگیا۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔
