واشنگٹن: امریکا نے پاکستان میں انتخابات کے اعلان کا خیر مقدم کیا ہے، امریکی ڈپٹی اسسٹنٹ سیکریٹری الزبتھ ہورسٹ نے کہا ہے کہ انتخابات کا اعلان حوصلہ افزا ہے۔
تفصیلات کے مطابق امریکی ڈپٹی اسسٹنٹ سیکریٹری الزبتھ ہورسٹ نے واشنگٹن میں پاکستانی میڈیا سے گفتگوکرتے ہوئے کہا پاکستان میں انتخابات کا اعلان حوصلہ افزا ہے، ہم آزادانہ، منصفانہ اور پرامن انتخابات کے انعقاد کے لیے پر امید ہیں۔
الزبتھ ہورسٹ نے کہا پاکستان اور امریکا کے مابین پائیدار شراکت داری ہے، دونوں ممالک کی متعدد معاملات میں مشترکہ دل چسپی ہے، پاکستان کے لیے معیشت اور موسمی تبدیلی بڑے چیلنجز ہیں۔ انھوں نے کہا کہ امریکا کو حالیہ دہشت گرد حملوں پر تشویش اور ان میں جانی و مالی نقصان پر افسوس ہے۔
امریکی ڈپٹی اسسٹنٹ سیکریٹری کا کہنا تھا کہ امریکا پاکستانی مصنوعات کا سب سے بڑا خریدار ہے، گزشتہ برس 9 بلین ڈالر کی تجارت ہوئی، امریکا کی طرف سے براہ راست غیر ملکی سرمایہ کاری 250 ملین ڈالر رہی۔
الزبتھ ہورسٹ نے امریکی امداد کا تذکرہ بھی کیا، انھوں نے کہا کہ سیلاب متاثرین کی بحالی کے لیے امریکا نے 215 ملین ڈالر پاکستان کو دیے۔
