ایلون مسک نے ایک انٹرویو میں یہ دل چسپ انکشاف کیا ہے کہ ٹوئٹر کا سی ای او اب ان کا پالتو کتا ہے۔
تفصیلات کے مطابق ٹویٹر کے باس ایلون مسک نے بی بی سی کو ایک طویل انٹرویو دیا ہے، یہ انٹرویو ٹویٹر ہیڈکوارٹر میں کیا گیا، جس میں انھوں نے ٹویٹر بیچنے کا بھی ارادہ ظاہر کیا۔
مسک نے انٹرویو کے دوران یہ کہتے ہوئے مذاق کیا کہ ’’وہ اب ٹویٹر کے سی ای او نہیں رہے، ان کی جگہ ان کے پالتو کتے شیبا اِنو نے لے لی ہے، جس کا نام فلوکی ہے۔‘‘
ایلن مسک نے کہا کہ اگر انھیں مناسب شخص مل گیا تو وہ کمپنی کو فروخت کر دیں گے، تاہم ان کا کہنا تھا کہ نئے سی ای او کے لیے ان کے ذہن میں کسی کا نام نہیں ہے۔
The new CEO of Twitter is amazing pic.twitter.com/yBqWFUDIQH
— Elon Musk (@elonmusk) February 15, 2023
ان سے جب سوال کیا گیا کہ ٹوئٹر میں ان کا وقت کیسا گزر رہا ہے، تو انھوں نے جواب دیا ’’یہ بالکل مزے کا نہیں ہے، بلکہ بعض اوقات تکلیف دہ ہو جاتا ہے۔‘‘ مسک نے اس کام کو ایک رولرکوسٹر سے تشبیہہ دی۔
ایلون مسک نے دفتر میں سونے کا بھی انکشاف کیا، اور کہا کہ کام کے بوجھ کی وجہ سے وہ کبھی کبھی دفتر میں سو جاتے ہیں، انھوں نے کہا ’’لائبریری میں ایک جگہ پر ایک صوفہ جس پر کوئی نہیں جاتا، میں وہاں سوتا ہوں۔‘‘
