کراچی: کرونا وائرس کے باعث صوبہ سندھ میں وزیراعلیٰ سندھ مراد علی شاہ نے ایمرجنسی نافذ کر دی۔
تفصیلات کے مطابق کراچی میں وزیراطلاعات ناصر حسین شاہ اور وزیر تعلیم سندھ سعید غنی نے علما سے ملاقات کی۔علما کو سندھ حکومت کی جانب سے انسداد کرونا اقدامات سے آگاہ کیاگیا۔
ناصر حسین شاہ کا کہنا تھا کہ سندھ حکومت کرونا سے بچاؤ پر اقدامات بروئے کار لا رہی ہے، وزیر اعلیٰ سندھ نے صوبے میں اس حوالے سے ایمرجنسی نافذ کر دی ہے۔ صوبائی وزرا کا کہنا تھا کہ وبا سے نبردآزما ہونے کے لیے تمام افراد کو اپنا کردار ادا کرنا ہوگا۔
مفتی منیب الرحمان کا کہنا تھا کہ مساجد اور علما کرونا سے بچاؤ پر ایڈوائزری پہنچانے میں علما کردار ادا کریں،سیاسی نہیں انسانی مسئلہ ہے ، ہر طرح سے حکومت سندھ کے ساتھ ہیں۔
پاکستان میںکرونا کیسز کی تعداد 31 تک پہنچ گئی
وفاقی دارالحکومت میں ایک اور کراچی میں کرونا وائرس کے مزید 2 کیسز سامنے آگئے جس کے بعد ملک میں مریضوں کی مجموعی تعداد 31 تک پہنچ گئی جن میں سے ایک خاتون کی حالت تشویش ناک ہے۔
واضح رہے کہ رواں ماہ 11 مارچ کو عالمی ادارہ صحت نے کرونا وائرس کو عالمگیر وبا قرار دیا تھا، یہ وائرس اب تک 114 ممالک میں پھیل چکا ہے اور اب تک ایک لاکھ سے زائد افراد متاثر جبکہ 5 ہزار سے زائد ہلاک ہوچکے ہیں ۔
