ابو ظہبی: متحدہ عرب امارات کی ایئر لائنز ایمریٹس اور اتحاد ایئر ویز نے ایک نیا معاہدہ کیا ہے جس کے تحت مسافروں کو کسی بھی ایئر پورٹ سے آنے جانے کی اجازت ہوگی۔
اردو نیوز کے مطابق متحدہ عرب امارات کی ایئر لائنز ایمریٹس اور اتحاد ایئر ویز نے ملک میں سیاحت کو فروغ دینے کے لیے ایک معاہدہ کیا ہے جس کے تحت مسافر سنگل ٹکٹ کے ذریعے ایک سے زیادہ مقامات سے لطف اندوز ہو سکیں گے۔
اس معاہدے کے تحت مسافر دبئی یا ابو ظہبی کے لیے سنگل ٹکٹ بک کر سکیں گے اور کسی دوسرے ایئر پورٹ سے واپس آسکیں گے، مسافروں کو آزادی حاصل ہوگی کہ وہ اپنی سہولت کے تحت اپنے سفر کا پلان بنا سکیں۔
ایمریٹس کے صدر ٹم کلارک نے کہا کہ ہمیں اتحاد ایئر ویز کے ساتھ دوبارہ کام کر کے خوشی ہو رہی ہے۔ دونوں ایئر لائنز عرب امارات آمد اور روانگی کے لیے بہترین آپشنز دے رہی ہیں جس سے سیاحت کو فروغ ملے گا۔
اس معاہدے کے تحت ابتدائی طور پر یورپ اور چین سے آنے والے مسافروں کو سہولت دی جائے گی۔
اتحاد ایئر ویز کے سی ای او انتونو آلدو نیوز کا کہنا تھا کہ ہمارے معاہدے سے مسافروں کو سہولت ہوگی کہ وہ ایک ٹکٹ پر دبئی اور ابو ظہبی کے سفر سے لطف اندوز ہو سکیں، مسافروں کے لیے یہ ہر لحاظ سے بہترین آپشن ہے۔
جمعرات کو ایمریٹس کے چیف کمرشل آفیسر عدنان کاظم اور اتحاد کے چیف آپریٹنگ آفیسر محمد البلوکی نے دبئی میں اس معاہدے پر دستخط کیے۔
دونوں ایئر لائنز کی شراکت امارات میں سیاحت کو فروغ دینے اور اسے سیاحت کے لیے چوٹی کے ممالک کی صف میں کھڑا کرنے کے عزم کو ظاہر کرتی ہے۔
