متحدہ عرب امارات (یو اے ای) کی قومی فضائی کمپنی ’ایمریٹس‘ نے دبئی کا سفرکرنے والوں کو خوشی کی خبر سنادی۔
بین الاقوامی خبر رساں ادارے کی رپورٹ کے مطابق ایمریٹس کا سفر کرنے والے ان مسافروں کو فائیو سٹار ہوٹل میں مفت رہائش کی سہولت دینے کی پیشکش کی گئی ہے جن کا قیام 24 گھنٹے یا اس سے زیادہ ہوگا۔
ایمریٹس ایئرلائنز کے نائب صدر اور چیف کمرشل آپریشنز آفیسر عدنان کاظم کے مطابق موسم گرما کے دوران دبئی آنے والوں کو سالانہ تفریحی اور شاپنگ فیسٹیولز (دبئی سمر سرپرائزز) میں شرکت اور خریداری کے بے شمار مواقع ملیں گے۔
عرب میڈیا کے مطابق یکم جولائی سے 21 جولائی 2024 تک فرسٹ کلاس یا بزنس کلاس کا ریٹرن ٹکٹ خریدنے والے مسافر دبئی کے فائیو سٹار ہوٹل جے ڈبلیو میریٹ مارکوئس میں دو رات کے مفت قیام کی سہولت حاصل کرسکیں گے۔
ایمریٹس نے پریمیم یا اکانومی کلاس کے مسافروں کے لیے بھی ایک رات کے مفت قیام کی پیشکش کا اعلان کیا ہے۔
ایمریٹس ایئر لائن کی جانب سے یہ خصوصی پیشکش 4 جولائی سے 15 ستمبر 2024 کے درمیان سفر کرنے والے تمام مسافروں کے لیے تمام ریٹرن ٹکٹوں پر قابل عمل ہوگی۔
یہ سہولت حاصل کرنے کے لئے ضروری ہے کہ دبئی آنے والے مسافر اپنی آمد سے کم از کم 96 گھنٹے پہلے ایئرلائنز کو ای میل پر اپنی تمام تفصیلا ت دیں گے، ایئرلائن ای میل کے ذریعے جے ڈبلیو میریٹ ہوٹل میں رہائش کی کنفرمیشن فراہم کرے گی۔
یو اے ای اور عمان میں یکم محرم کو تعطیل کا اعلان
خصوصی پیشکش ایمریٹس ایئرلائنز کی ویب سائٹ، موبائل ایپ یا ایمریٹس ایئر کے آفس یا ٹریول ایجنٹس کے ذریعے ٹکٹ خریدنے پر بھی دی جائے گی۔
