لاہور: سابق ٹیسٹ کرکٹر مرحوم عبدالقادر کو ستارہ امتیاز ملنے پر ان کے بیٹوں کرکٹر عثمان قادر اور سلمان قادر نے جذباتی پیغام دیا ہے۔
تفصیلات کے مطابق گزشتہ روز گورنر ہاؤس میں ہونے والی پروقار تقریب میں ستارہ امتیاز کا اعزاز سابق کرکٹر عبدالقادر کی اہلیہ نے وصول کیا تھا، گورنر پنجاب چوہدری سرور نے سابق اسپنر عبدالقادر مرحوم کو بعداز وفات ستارہ امتیاز سے نوازا تھا۔
مرحوم عبدالقادر کو ستارہ امتیاز ملنے پر ان کے بیٹوں نے بھی جذباتی پیغام دیا۔
قومی ٹیم میں شامل عثمان قادر کا کہنا تھا کہ والد کی خدمات پر ستارہ امتیاز دینے پر حکومت کا شکریہ ادا کرتے ہیں۔
اسی طرح ان کے دوسرے بیٹے سلمان قادر کا کہنا تھا کہ آج ان کے اہلخانہ کے لیے بہت خوشی کا دن ہے۔
واضح رہے کہ دو سال قبل عبدالقادر حرکت قلب بند ہونے سے 63 برس کی عمر میں انتقال کرگئے تھے۔
اپنے دور میں عبدالقادر نے لیگ اسپنر کی حیثیت سے ٹیم کی فتوحات میں اہم کردار ادا کیا، گگلی ماسٹر نے ٹیسٹ میں 236 اور ون ڈے میں 132 وکٹیں حاصل کیں۔
