گوجرانوالہ: پنجاب کے شہر گوجرانوالہ میں ملازمین نے پیسوں کی لالچ میں تین مالکان کو تیز دار آلے سے قتل کردیا۔
تفصیلات کے مطابق گوجرانوالہ میں ملازمین نے پیسوں نے لالچ میں مالکان کو قتل کردیا، قتل ہونے والوں میں 2 سگے بھائی اور بھتیجا شامل ہیں۔
نمائندہ اے آر وائی نیوز غلام فرید کے مطابق وزیر آباد کے علاقہ پٹھانوالی میں ملازمین واردات کےبعد موقع سے فرار ہوگئے۔
واقعے کی اطلاع پر پولیس کی بھاری نفری موقع پر پہنچ گئی اور نعشوں کو تحویل میں لے کر پوسٹ مارٹم کے لیے اسپتال منتقل کردیا۔
مزید پڑھیں: گوجرانوالہ: پیشی پر جانے والے باپ بیٹے سمیت 4 افراد قتل
پولیس کے مطابق قتل ہونے والوں میں دو سگے بھائی اور بھتیجا شامل ہیں اور مقتولین ذکا اللہ اور شفاعت اللہ دونوں بھائی کونسلر بھی رہ چکے ہیں۔
رپورٹ کے مطابق ملزمان کو شبہ تھا کہ مالکان نے سترہ ایکڑ اراضی بیچ کر پیسے گھرمیں رکھے ہیں اور بھاری رقم ہتھیانے کی نیت سے گھر میں گھس کر حملہ کرکے ذکا اللہ، شفاعت اللہ اور عتیق کو قتل کیا۔
پولیس کا کہنا ہے کہ واقعے کی تحقیقات کی جارہی ہیں اورملزمان کی گرفتاری کے لیے علاقے کی ناکہ بندی کردی گئی ہے۔
