The news is by your side.

Advertisement

اسلام آباد پولیس شہدا کے 262 بچوں کو محکمے میں مستقل کر دیا گیا

اسلام آباد: وفاقی دارالحکومت کی پولیس کے شہدا کے 262 بچوں کو محکمے میں مستقل کر دیا گیا۔

تفصیلات کے مطابق اسلام آباد پولیس شہدا کے 262 بچوں کو محکمے میں مستقل کر دیا گیا ہے، آئی جی اسلام آباد قاضی جمیل الرحمٰن نے شہدا کے بچوں کو مستقل کرنے کے سرٹیفکیٹس بھی تقسیم کر دیے۔

سرٹیفکیٹس کی تقسیم کی تقریب پولیس لائن ہیڈ کوارٹر میں منعقد کی گئی، جس سے خطاب میں آئی جی اسلام آباد نے کہا ہم سب کے لیے بڑی خوشی کا دن ہے، میں آپ کو آپ کے خاندان اور ان افسران کو مبارک باد پیش کرتا ہوں، جن کی کاوشوں کی بدولت آپ محکمہ پولیس میں مستقل بنیادوں پر اپنے فرائض منصبی انجام دیں گے۔

انھوں نے کہا محکمہ پولیس نے اپنے شہدا کے ساتھ کیا ہوا وعدہ پورا کر دیا ہے، جو ہمارے لیے بڑے اعزاز کی بات ہے، آپ کے والدین عظیم انسان تھے جنھوں نے ملک و قوم کی خاطر اپنی جانوں کا نذرانہ پیش کیا۔

آئی جی اسلام آباد نے کہا آپ اس محکمہ کی اگلی نسل ہیں آپ کو محنت اور لگن سے کام کرتے ہوئے اپنے والدین اور محکمے کا نام روشن کرنا ہے، ہم جس رینک میں بھی ہوں یا جس بھی شعبے میں ہوں، پوری ایمان داری سے محکمہ کی کامیابی کے لیے اپنا کردار ادا کرنا ہوگا۔

قاضی جمیل الرحمٰن کا کہنا تھا شہدا ہمارا سرمایہ ہیں ان کے خاندان کا خیال رکھنا، بنیادی سہولیات فراہم کرنا ہماری اولین ترجیح ہے۔ دریں اثنا، باقاعدہ طور پر وزیر اعظم پاکستان کے شہدا پیکج کی منظوری کے بعد تقریب میں 262 بچوں کو مستقل تقرری سرٹیفکیٹس تقسیم کیے گئے۔

Comments

یہ بھی پڑھیں