کراچی پورٹ ٹرسٹ (کے پی ٹی) نے اربوں روپے مالیت کی قبضہ کی گئی زمین واگزار کرالی، ٹاسک فورس نے آپریشن مچھر کالونی کیماڑی میں کیا۔

اس حوالے سے کراچی پورٹ ٹرسٹ کے ترجمان نے اپنے بیان میں بتایا ہے کہ کے پی ٹی کی 20 اریکڑ اراضی سے غیر قانونی تجاوزات واگزار کرائی گئی ہیں۔

کارروائی وزیراعظم کی قائم بحری امور ٹاسک فورس کے ایجنڈا نکات کا حصہ تھی، آپریشن مچھر کالونی کیماڑی میں کیا گیا جس میں 20 ایکڑ اراضی واگزار کرائی گئی۔

ترجمان کے مطابق آپریشن کمشنر کراچی کی ہدایات کے مطابق اسسٹنٹ کمشنر کی قیادت میں کیا گیا، انسداد تجاوزات آپریشن میں رینجرز، پولیس، کے پی ٹی اینٹی انکروچمنٹ ٹیم  نے حصہ لیا۔

ترجمان نے کہا کہ پورٹ انٹیلی جنس، کے پی ٹی پورٹ سیکیورٹی فورس نے بھی آپریشن میں شرکت کی، آپریشن میں تقریباً100گودام، کیٹل فارمز، چھپڑے، زیر تعمیر گھروں کو گرایا گیا۔

اس کے علاوہ کے پی ٹی نے تاحال 9 آپریشنز میں 2 ایکڑ اراضی ڈاکس کالونی، بدر کالونی میں واگزار کرائی، 4 ایکڑ اراضی یونس آباد، 1ایکڑ پارکنگ ایریا،1 ایکڑ اراضی کیماڑی مارکیٹ ایریا میں واگزار کرائی گئی۔

 8 ایکڑ ہجرت کالونی، 8 ایکڑ سکندر آباد،4.8ایکڑ اراضی پلاٹ5تا8جنگل شاہ میں واگزار کرائی 21 جنوری سے جاری آپریشنز میں تقریباً 50 ایکڑ زمین واگزار کرالی گئی۔

ترجمان کے پی ٹی کا مزید کہنا ہے کہ وزیراعظم کی سربراہی میں قائم ٹاسک فورس کے آپریشن جاری رہیں گے، آپریشن میں حکومت سندھ اور قانون نافذ کرنےوالے اداروں کا تعاون حاصل ہے۔

یاد رہے کہ چند روز قبل سینیٹ کی قائمہ کمیٹی بحری امور کا اجلاس فیصل واوڈا کی زیرِ صدارت ہوا۔ اجلاس سے خطاب کرتے ہوئے سینیٹر فیصل واوڈا کا کہنا تھا کہ کراچی پورٹ کی 40ارب روپے کی سرکاری قیمت کی زمین 5 ارب روپے میں دے دی گئی۔

چیئرمین کمیٹی بحری امور فیصل واوڈا نے اجلاس میں انکشاف کیا کہ کراچی پورٹ کی 500 ایکڑ کی زمین کی مارکیٹ ویلیو 60 ارب روپے سے زیادہ ہے۔ ان کا کہنا ہے کہ کراچی پورٹ میں زمین کی الاٹمنٹ میں میگا اسکینڈل ہے۔