ندن: برطانوی حکومت نے انگلینڈ کا دورہ کرنے والی بھارتی کرکٹ ٹیم کے اہل خانہ کو بڑی خوشخبری سنادی ہے۔
تفصیلات کے مطابق حکومت برطانیہ نے انگلینڈ کا دورہ کرنے والی انڈیا کی (مرد و خواتین ) ٹیم کے کھلاڑیوں، کوچنگ اور معاون عملے کے خاندانوں کو اپنے اہل خانہ کے ساتھ دورے پر جانے کی منظوری دے دی ہے۔
رپورٹ کے مطابق دونوں ٹیموں کے ارکان کے اہل خانہ اسی چارٹر پرواز سے انگلینڈ روانہ ہوں گے، جس میں مرد وخواتین ٹیم کے ممبران ہوں گے، پرواز تین جون کو لندن پہنچے گی، یہاں سے دونوں ٹیمیں ساوتھمپٹن جائیں گی، جہاں ان کا قرنطینہ شروع ہوگا، تاہم ابھی تک حکام یہ واضح نہیں کیا کہ آئسولیشن پریڈ کا دورانیہ کتنا ہوگا؟۔
انڈیا کی مینز ٹیم برطانیہ میں چار ماہ قیام کرےگی، اس دوران انگلینڈ کے خلاف پانچ میچوں کی ٹیسٹ سیریز سے قبل وہ نیوزی لینڈ کے خلاف ورلڈ ٹیسٹ چیمپیئن شپ کا فائنل کھیلے گی۔
اطلاعات کے مطابق انڈین وومن ٹیم قرنطینہ پریڈ مکمل کرنے کے بعد برسٹل روانہ ہوگی، جہاں وہ انگلینڈ کے خلاف ایک ٹیسٹ میچ کھیلے گی، ٹیسٹ کے بعد وومن ٹیم کو تین ایک روزہ میچز اور ٹی ٹوئنٹی سیریز کھیلنی ہے۔
اس وقت بھارت کی دونوں ٹیمیں ممبئی کے ہوٹل میں اپنا آئسولیشن پریڈ گزار رہی ہیں۔
قابل ذکر بات ہے کہ آئی سی سی نے انتیس مئی کو اعلان کیا تھا کہ حکومت برطانیہ کی جانب سے ورلڈ ٹیسٹ چیمپئن کے فائنل کو اسٹینڈرڈ کرونا پروٹوکولز سے اس صورت میں مستشنیٰ قرار دیا کہ تمام ٹیمیں برطانیہ میں جاری ایس او پیز کی پابندی کرینگی۔
ہندوستانی مرد اور خاتون ٹیم کے لئے رعایت اس لئے اہم ہے کیونکہ برطانیہ حکومت نے ہندوستان کو ان ممالک کی ریڈ لسٹ میں ڈال دیا تھا، جہاں سے اپریل سے ہی تمام طرح کے سفر پر پابندی ہے۔
