لندن: انگلش کرکٹ بورڈ(ای سی بی) کے چیئرمین آئن واٹمور عہدے سے مستعفی ہوگئے، انگلینڈ ٹیم کے دورہ پاکستان کی منسوخی کے بعد سے وہ دباؤ میں تھے۔
برطانوی میڈیا کے مطابق انگلش کرکٹ ٹیم کا دورہ پاکستان منسوخ کرنے کے بعد آئن واٹمور پر دباؤ تھا، برطانوی وزیراعظم بھی دورہ کینسل ہونے پر ناراض تھے تاہم اب چیئرمین ای سی بی نے عہدہ چھوڑ دیا ہے۔
آئن واٹمور صرف 10 ماہ چیئرمین کے عہدے پر رہے جبکہ ان کے عہدے کی مدت 5 سال تھی۔ دورہ پاکستان کی منسوخی پر انہوں نے میڈیا اور سابق کرکٹرز کی جانب سے شدید تنقید کا بھی سامنا کیا۔
خیال رہے کہ گزشتہ مہینے سیکیورٹی خدشات کا بہانہ بنا کر پہلے نیوزی لینڈ نے اپنی ٹیم کو پاکستان سے واپس بلا لیا تھا بعد ازاں صورت حال کو دیکھتے ہوئے انگلینڈ کرکٹ ٹیم نے بھی دورہ پاکستان منسوخ کیا۔
سیریز کی منسوخی پر دونوں کرکٹ بورڈ شدید تنقید کی زد میں ہیں۔ حالیہ دنوں برطانوی صحافی لارنس بوتھ نے بھی انگلینڈ کرکٹ بورڈ(آئی سی بی) کے فیصلے کو غلط قرار دیا اور کہا تھا انگلینڈ کا دورہ پاکستان منسوخ کرنے کا فیصلہ اچھا نہیں تھا۔
