انقرہ : ترک صدر رجب طیب اردوان نے پاکستان کی واضح حمایت کا دو ٹوک اعلان کرتے ہوئے کہا کہ اچھے برے دنوں میں برادرپاکستانی قوم کے ساتھ کھڑا ہیں۔
تفصیلات کے مطابق ترکیہ کے صدررجب طیب اردوان نے کابینہ اجلاس سے خطاب میں پاکستانی قوم کے ساتھ اپنی حمایت کاواضح اعلان کرتے ہوئے کہا پاکستان اور بھارت کے درمیان جنگ بندی پر ہمیں خوشی ہے، کشمیر میں دہشت گرد حملے اور پاکستان پرمیزائل حملوں پر واضح موقف کا اظہارکیا۔
ترک صدراردوان کا کہنا تھا کہ پاک بھارت تناؤ کم کرنے کیلئے انتھک کوششیں کیں، پاک بھارت کے درمیان تناؤ انتہائی خطرناک سطح تک پہنچ گیا تھا۔
انھوں نے بتایا کہ اپنے بھائی وزیراعظم شہباز شریف کو ٹیلی فون کیا، اہم گفتگو ہوئی، پاکستانی بھائیوں کو ان کے صبر و تحمل اور دانشمندانہ موقف پر مبارکباد پیش کرتا ہوں۔
ترک صدر نے مزید کہا کہ خواہش ہے جنگ بندی سے قائم پرسکون ماحول میں تمام مسائل حل ہوں اور پانی کے مسئلے سمیت تمام مسائل پرسکون طریقے سے حل ہوجائیں، ترکیہ ان شااللہ برادر پاکستانی قوم کیساتھ ان کے اچھے اور برے دنوں میں کھڑا رہے گا۔
دوسری جانب وزیراعظم شہبازشریف نے ترک صدر کی جانب سے پاکستان کی بھرپور حمایت اور یکجہتی کا شاندار خیر مقدم کرتے ہوئے سوشل میڈیا پلیٹ فارم پراپنے پیغام میں کہا کہ پاکستان کوترکیہ کےساتھ اپنے دیرینہ برادرانہ تعلقات پرفخر ہے،دونوں ملکوں کے تعلقات ہرنئے چیلنج کے ساتھ مزید مضبوط ہوئےہیں۔
ان کا کہنا تھا کہ جنوبی ایشیا میں امن کے فروغ کیلئےترک صدرکےتعمیری کردارپرشکرگزارہوں،ہم دونوں ملکوں کےعوام کےروشن اور خوشحال مستقبل کی تعمیر کیلئے مل کرکام کرنے کے لیے پرعزم ہیں۔
