انقرہ: ترک صدر رجب طیب اردوگان نے کہا ہے کہ دورہ جرمنی خوشگوار اور کامیاب رہا، دونوں ملکوں کے درمیان تعلقات مضبوط ہوں گے۔
ان خیالات کا اظہار انہوں نے میڈیا سے گفتگو کرتے ہوئے کیا، ترک صدر کا کہنا تھا کہ یہ ایک اہم دورہ تھا، اس دروان جرمن چانسلر سمیت دیگر اعلیٰ عہدیداروں سے ملاقاتیں کیں اور دوطرفہ امور پر تبادلہ خیال کیا۔
انہوں نے کہا کہ جرمن چانسلر انجیلا مرکل سے ہونے والی ملاقات میں دہشت گردی کے خاتمے کے لیے جرمنی کے تعاون کی اپیل کی اور مثبت ردعمل کا مظاہرہ کیا گیا۔
ترک صدر کا کہنا تھا کہ جرمنی سے تعلقات میں کشیدگی ختم کرکے معاشی طور پر بھی دونوں ملکوں کے درمیان مضبوط روابط چاہتے ہیں تاکہ خطے میں ترقی ہو۔
ترک صدر اردوان نے جرمنی میں جامع مسجد کا افتتاح کردیا
ان کا کہنا تھا کہ دونوں ممالک کی کوشش ہے کہ اختلافات کو بالائے طاق رکھتے ہوئے باہمی امور پر توجہ مرکوز کی جائے۔ اس دورے کے دوران ترک صدر نے اپنے جرمن ہم منصب فرانک والٹر شٹائن سے بھی ملاقات کی۔
علاوہ ازیں ترک صدر رجب طیب اردوگان نے جرمنی میں مسجد کا افتتاح بھی کیا، جس کا شمار یورپ کی بڑی مساجد میں ہوتا ہے، افتتاحی تقریب میں ہزاروں افراد نے شرکت کی۔
اس موقع پر ترک صدر کا جرمن حکومت کا شکریہ ادا کرتے ہوئے کہنا تھا کہ یہ مسجد امن کی نشانی ہے، کلون شہر کی مرکزی مسجد کو ترکی سے تعلق رکھنے والی ایک مسلم تنظیم نے تعمیر کیا ہے۔
