اسلام آباد: امریکی محکمہ خارجہ کے سینئر عہدے دار ایریک میئر نے اپنے دورہ پاکستان کے موقع پر وفاقی وزیر داخلہ محسن نقوی سے اہم ملاقات کی ہے۔
ملاقات میں قائم مقام امریکی سفیر نیٹلی بیکر، وفاقی وزیر طلال چوہدری اور سیکرٹری داخلہ خرم آغا بھی شریک رہے۔ محسن نقوی اور ایریک میئر میں پاک امریکا تعلقات سمیت باہمی دلچسپی کے امور اور دو طرفہ تعاون پر تفصیلی تبادلہ خیال ہوا جبکہ دہشتگردی، اسمگلنگ اور انسداد منشیات کے شعبوں میں اشتراک کار بڑھانے پر بات چیت ہوئی۔
اس موقع پر محسن نقوی نے کہا کہ جون میں مشترکہ کاونٹر ٹیررازم ڈائیلاگ کا انعقاد تعاون بڑھانے میں اہم ثابت ہوگا۔ انہوں نے ایریک مئیر کو انسداد دہشتگردی کے سلسے میں لیے گئے اقدامات سے آگاہ کیا۔
وفاقی وزیر نے کہا کہ دہشتگردی صرف پاکستان کی جنگ نہیں بلکہ نمٹنے کیلیے عالمی برادری کو تعاون کرنا ہوگا، پاکستان کو بھی امریکا کی طرح غیر قانونی تارکین وطن کے مسائل کا سامنا ہے۔
ملاقات میں ایریک مئیر نے مطلوب دہشتگرد شریف اللہ کی گرفتاری میں تعاون پر پاکستان کا شکریہ ادا کیا جبکہ جعفر ایکسپریس پر دہشتگردوں کے حملے کی مذمت اور اس میں جانی نقصان پر اظہار افسوس کیا۔
سینئر امریکی عہدے دار کی سربراہی میں امریکی وفد پاکستان منرلز انویسٹمنٹ فورم میں شرکت کر رہا ہے۔ ایریک میئر نے منرلز انویسٹمنٹ فورم 2025 کے تحت فراہم مواقعوں میں دلچسپی کا اظہار کیا۔
اس پر محسن نقوی نے کہا کہ منرلز انویسٹمنٹ فورم سے امریکی کمپنیاں سرمایہ کاری سے فائدہ اٹھا سکتی ہیں، اس ضمن میں امریکی وفد کا دورہ اہم سنگ میل ثابت ہوگا۔
