پیرس: امریکا اور یورپ کی تجارتی جنگ میں شدت آگئی، یورپی یونین نے امریکی مصنوعات پر بھاری محصولات عائد کرنے کا فیصلہ کر لیا۔
تفصیلات کے مطابق امریکا کی جانب سے یورپی دھاتوں پر اضافی محصولات عائد کرنے کے بعد یورپ نے بھی امریکی مصنوعات کی یورپ درآمد پر اضافی محصولات عائد کرنے کی تیاری شروع کردی ہے۔
غیر ملکی خبر رساں ادارے کے مطابق یورپی یونین کی کمشنر برائے تجارتی امور سیلیا مالسٹروم نے کہا ہے کہ اگر امریکا یورپی کاروں کی امریکا درآمد پر اضافی محصولات عائد کرے گا تو یورپی یونین بھی امریکی مصنوعات پر اضافی ٹیکس عائد کرے گا۔
یورپی یونین کی کمشنر برائے تجارتی امور نے کہا ہے کہ یورپی یونین تقریباً 20 بلین ڈالر کی اضافی محصولات عائد کرے گا، محصولات کا مقصد امریکا کو اپنے حالیہ اقدامات سے پیچھے ہٹنے پر مجبور کرنا ہے۔
کاروں پر اضافی محصولات عائد کردی جائیں گی‘ امریکی صدر کی دھمکی
ان کا کہنا تھا کہ گذشتہ روز یورپی یونین کے صدر جین کلاؤڈ نے امریکی صدر ڈونلڈ ٹرمپ سے اسی بابت ملاقات کی تھی، ملاقات میں صدر ٹرمپ سے مطالبہ کیا گیا تھا کہ وہ اپنے یورپی اسٹیل اور ایلومینیم پر عائد اضافی محصولات واپس لیں۔
سیلیا مالسٹروم کا مزید کہنا تھا کہ امریکا سے اسی تناظر میں بات ہورہی ہے، چاہتے ہیں ملاقات باہمی مشاورت سے حل ہوجائے بصورت دیگر یورپی یونین امریکا سے متعلق اضافی ٹیکس کا پلان تیار کررہا ہے جس پر جلد عمل درآمد ہوگا۔
خیال رہے کہ امریکا کی جانب سے پہلے ہی یورپ کی اسٹیل اور ایلومینیم پر اضافی محصولات عائد کیے جاچکے ہیں، جبکہ رواں ماہ کے آغاز میں صدر ٹرمپ نے دھمکی بھرے پیغام میں کہا تھا کہ یورپی کاروں پر بھی درآمدی کی صورت میں اضافی ٹیکس عائد کی جاسکتی ہے۔
خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔
