The news is by your side.

Advertisement

“امریکی سونے اور چاندی نے یورپ کو سرمایہ فراہم کیا”

یورپ کی ترقّی میں سب سے اہم کردار اس لحاظ سے امریکا نے ادا کیا کہ جس کی کانوں سے سونا چاندی اور دوسری معدنیات یورپ آ رہی تھیں۔ آمدنی کا دوسرا ذریعہ جزائرِ غربُ الہند میں پلانٹیشن کے ذریعے زراعتی پیداوار ہوئی، خاص طور سے ’’شکر‘‘ کہ جس کی پیداوار اور تیاری میں افریقا سے غلاموں کو لایا گیا۔

امریکا کی اندرونی تجارت سے جو منافع ہو تا تھا، وہ بھی یورپ چلا جاتا تھا۔ ایک اندازے کے مطابق 1646ء میں 180 ٹن سونا اور 1700 ٹن چاندی امریکا سے یورپ گئی تھی۔ 1580ء سے 1561 تک 85 فی صد چاندی امریکا سے آئی۔ امریکی سونے اور چاندی نے یورپ کو سرمایہ فراہم کیا۔

اس کی وجہ سے یورپی اس قابل ہوئے کہ وہ زمین کی خریداری یا مزدوروں کو زیادہ تنخواہیں ادا کر سکتے تھے۔ اس وجہ سے انھوں نے بین الاقوامی تجارت کو کنٹرول کرنا شروع کیا۔ اس وقت کے بحری مراکز جیسے سوفالا، کالی کٹ اور ملاکا ان کے قبضے میں آگئے۔

امریکی سونے اور چاندی نے یورپ کے ابتدائی سرمایہ دار کو مؤثر ہتھیار فراہم کیے جس کی مدد سے اس نے غیر یورپی سرمایہ دار سے مقابلہ کیا اور اسے آگے نہیں بڑھنے دیا۔

(ڈاکٹر مبارک علی کی کتاب ’’یورپ کا عروج‘‘ سے انتخاب)

Comments

یہ بھی پڑھیں