یورپی یونین نے پاکستان میں ہونے والے الیکشن 2024 کے بعد انتخابی بے ضابطگیوں کی جامع اور بروقت تحقیقات کا مطالبہ کردیا۔
تفصیلات کے مطابق پاکستان میں عام انتخابات پر یورپی یونین کا ردعمل سامنے آگیا ہے جس میں یونین کا کہنا ہے کہ پاکستان میں کئی ماہ کی تاخیر کے بعد انتخابات کا انعقاد ہوا۔ پاکستان میں انتخابات غیریقینی صورتحال اور کشیدہ سیکیورٹی ماحول میں ہوئے۔
ای یو کا کہنا تھا کہ بعض رہنما انتخابات میں حصہ نہ لے سکے، لیول پلینگ فیلڈ کی عدم فراہمی پر افسوس ہے۔
یورپی یونین کی جانب سے انٹرنیٹ تک رسائی نہ ہونے اور انتخابی عمل میں مداخلت پر بھی افسوس کا اظہار کیا گیا ہے۔ انتخابی عمل کے دوران کارکنان کی گرفتاریوں پر بھی یورپی یونین نے اظہارِ افسوس کیا۔
ای یو کی جانب سے کہا گیا کہا کہ پاکستان ای یو الیکشن ایکسپرٹ مشن رپورٹ کی سفارشات پرعملدرآمد کرے۔ سیاسی جماعتوں کے رہنما پرتشدد کارروائیوں سے گریزکریں۔
یورپی یونین نے انتخابی عمل میں پرتشدد کاروائیوں کی مذمت کی جبکہ تمام رہنماؤں کو اختلافات کے حل کیلئے پرامن جمہوری رویہ اپنانے پر بھی زور دیا گیا ہے۔
گزشتہ انتخابات کی نسبت اس بار خواتین کے ووٹنگ کی شرح میں اضافےکا یورپی یونین نے خیرمقدم کیا ہے۔
