برسلز : یورپی یونین نے روس کو یوکرائن کے خلاف جارحیت پر سنگین نتائج کی دھمکی دیتے ہوئے کہا ہے کہ روس کے خلاف پابندیاں عائد کرنے کی تیاریاں کرلی گئی ہیں۔
یورپی یونین کی خارجہ پالیسی کے سربراہ جوزپ بوریل نے برسلز میں یورپی یونین کی27 ریاستوں کے رہنماؤں کے اجلاس میں شرکت کے لیے پہنچے۔
اس موقع پر انہوں نے صحافیوں کو بتایا کہ یورپی یونین روس کے خلاف پابندیوں کا مکمل سیٹ تیار کر رہی ہے جس پر جمعرات کو یورپی یونین کے سربراہی اجلاس میں بحث کی گئی۔
انہوں نے کہا کہ میں ابھی یہ نہیں بتا سکتا کہ یہ والی کون سی پابندیاں ہوں گی لیکن ہم معاہدے سے پہلے اس پر بات کرنے جا رہے ہیں اور یہ بات یقینی ہے کہ روس کے خلاف ہم پابندیوں کا ایک مکمل سیٹ تیار کر رہے ہیں۔.
ان سے جب یہ سوال پوچھا گیا کہ کیا یورپی یونین کے ممالک اس معاملے پر اتفاق رائے تک پہنچنے میں کامیاب ہو جائیں گے؟ تو اس کے جواب میں بوریل نے کہا جی ہاں یورپی یونین کے تمام ممالک روس کے خلاف پابندیوں کے پرزور حمایتی ہیں۔
اس حوالے سے سربراہ یورپی کمیشن ارسلا ونڈر نے کہا تھا کہ اگر روس نے یوکرائن پر حملہ کیا تو اسے اس اقدام کے سنگین نتائج کا سامنا کرنا پڑے گا۔ یہ روس کے لیے واضح اور کھلا پیغام ہے، جارحیت کی قیمت بہت زیادہ ہوگی۔
