کراچی: سابق ایڈمنسٹریٹر کراچی فہیم الزماں کی جانب سے پولیس اہلکاروں کو دھمکیاں دینے کے واقعے پر پولیس نے مقدمہ درج کرکے انہیں گرفتار کرنے کا فیصلہ کیا ہے۔
تفصیلات کے مطابق سابق ایڈمنسٹریٹر کراچی فہیم الزماں نے پی آئی ڈی سی کے قریب اسنیپ چیکنگ کے دوران شناختی کارڈ دکھانے کا کہنے پر پولیس اہلکاروں کو دھمکیاں دیں جس کا ڈی آئی جی ساؤتھ نے نوٹس لیتے ہوئے مقدمہ درج کرنے کا حکم دیتے ہوئے گرفتار کرنے کا فیصلہ کیا ہے۔
[bs-quote quote=”مقدمے میں اہلکاروں کو دھمکیاں، قانون کی خلاف ورزی کی دفعات شامل کی جائیں گی” style=”style-8″ align=”left” author_name=”ڈی آئی جی ساؤتھ”][/bs-quote]
ڈی آئی جی ساؤتھ نے کہا ہے کہ سابق ایڈمنسٹریٹر فہیم الزماں کے خلاف ایف آئی آر درج کی جائے گی، ان کے خلاف قانونی کارروائی عمل میں لائی جائے گی، مقدمے میں اہلکاروں کو دھمکیاں، قانون کی خلاف ورزی کی دفعات شامل کی جائیں گی۔
پولیس حکام کا کہنا ہے کہ پولیس اہلکاروں سے بدتمیزی کسی صورت بھی برداشت نہیں کی جائے گی، پولیس اہلکاروں نے فہیم الزماں سے بدکلامی نہیں کی۔
مزید پڑھیں: پولیس تشدد کیس : شہری شفیق کیخلاف ایک مقدمہ درج
پولیس اہلکارعدنان کا کہنا ہے کہ ریڈزون میں اسنیپ چیکنگ پر تھے فہیم زماں کی گاڑی گزری، میں نے گاڑی کے ڈرائیور کو کہا شناختی کارڈ دکھاؤ ڈرائیور کے ساتھ بیٹھا شخص غصے میں آگیا اور کہا شناختی کارڈ کیوں دکھاؤں۔
پولیس اہلکار کے مطابق ریڈزون میں جس گاڑی پر ہمیں شک ہوتا ہے اسے روک کر چیک کرتے ہیں، فہیم زمان نے دھمکیاں اور مغلظات بکیں، ڈرائیور سے کہا ان پر گاڑی چڑھا دو، واقعے کے بعد وہ اپنے ڈرائیور کے ساتھ بغیر شناختی کارڈ دکھائے چلے گئے۔
سابق ایڈمنسٹریٹر کے خلاف تھانہ سول لائن میں مقدمہ درج، 4 دفعات شامل
سابق ایڈمنسٹریٹر کراچی فہیم زمان کے خلاف تھانہ سول لائن میں مقدمہ درج کرلیا گیا، مقدمہ اہلکار عدنان کی مدعیت میں درج کیا گیا، پولیس کے مطابق مقدمے میں 4 دفعات لگائی گئی ہیں، کارسرکار میں مداخلت، دھمکی، گالم گلوچ، ٹریفک میں خلل کی دفعات شامل ہیں۔
